Aktar kmieni din il-ġimgħa l-Italja, pajjiż magħruf għall-ospitalità tiegħu, ddeċieda li jgħatti l-istatwi nudi li hemm f’diversi mużewijiet f’Ruma. Dan hekk kif l-awtoritajiet ħassew li kien xieraq li b’rispett taż-żjara tal-President Iranjan Hassan Rohani – liema president iltaqgħa mal-President Taljan Matteo Renzi nhar it-Tnejn li għadda.
Ma jistax jonqos li aħbar kontroversjali bħal din ma tispiċċax ukoll fuq il-mezzi soċjali, hekk kif bosta Taljani ħassewhom mneżżgħin aktar mill-istess statwi, mill-kultura li ssawwar lill-Bell’Paese.
It-Taljani urtati daru għall-mezzi soċjali biex jipprotestaw kontra din id-deċiżjoni. Fost l-oħrajn, Giorgia Meloni, eks ministru tal-gvern ta’ Berlusconi, permezz ta’ dan ir-ritratt ikkritikat din id-deċiżjoni. F’kumment ironiku fuq Facebook hi qalet li issa l-pjan tal-Gvern ta’ Renzi huwa li jgħatti l-Vatikan biex ma jurtax is-sensibilità tal-Emir Musulman tal-Qatar, Al-Thani li kellu jasal Ruma din il-ġimgħa wkoll.