Jintbagħat sena ħabs wara li seraq mis-suq tal-Belt

Ir-raġel li kien inqabad jisraq medalji storiċi mill-mużew marittimu xahar ilu, sab ruħu lura fl-awla tal-qorti wara li nqabad jisraq ammont ta’ flus mis-suq tal-Belt.

Justin Mallia, 26, minn Bormla, wieġeb ħati ta’ akkuża ta’ serq, aggravat bil-valur, quddiem il-Maġistrat Victor Axiak nhar il-Ġimgħa.

L-Ispettur tal-Pulizija Gabriel Micallef, li qed imexxi l-prosekuzzjoni flimkien mal-Ispettur Tilden Tabone, qal lill-Qorti li €930 fi flus kontanti kienu ġew irrappurtati misruqa mill-kamra ta’ ħanut fl-14 ta’ Marzu.

Filmati tas-CCTV u deskrizzjonijiet mogħtija minn nies li kienu fil-viċinanzi wasslu għall-identifikazzjoni ta’ Mallia.

L-imputat ġie rintraċċat fil-ħabs ta’ Kordin, fejn kien qed jinżamm b’rabta mas-serqiet fil-mużewijiet.

Mallia ammetta għall-interrogazzjonijiet li kien seraq il-flus, li l-pulizija ma setgħux jirkupraw.

L-Avukat Martina Herrera, li qed tassisti lill-imputat bħala avukat, talbet piena ħafifa, suġġeriment issekondat mill-prosekuzzjoni li spjegat li l-imputat kien qed jagħmel minn kollox biex jirritorna l-flus misruqa.

Wara li ddiskutiet is-sentenza privatament mal-avukati, il-Qorti ddikjarat lil Mallia ħati tal-akkużi kollha, inklużi dawk li kiser il-probation u li kien reċidiv, u kkundannatu għal 12-il xahar ħabs.

Huwa kien marbut ukoll li jħallas lura l-flus misruqa, permezz tal-pulizija, fi żmien sitt xhur mill-ħelsien tiegħu.