Partitarju tal-futbol mhux se jitħalla jattendi għal logħbiet fi kwalunkwe post madwar il-pajjiż b'mod temporanju, wara inċidenti fl-Istadium Nazzjonali f'Ta' Qali.
Iż-żagħżugħ ta' 22 sena minn Pembroke kien akkużat illi f'żewġ każi separati, ġab ruħu b'mod abbużiv, uża lingwaġġ oxxen fil-pubbliku, m'obdiex ordnijiet leġittimi, inċità dan l-inkwiet u kiser il-paċi pubblika.
Dawn l-inċidenti seħħew iktar kmieni dan ix-xahar.
L-avukata tal-akkużat Martha Mifsud qalet illi l-klijent tagħha qed iwieġeb mhux ħati għall-akkużi miġjubin kontrih. "Forsi intqalu xi affarijiet vera, imma dan mhux xi kriminal kbir," qalet filwaqt rrimarkat illi l-akkużat għadu żgħir.
Il-Qorti m'oġġezzjonatx għall-ħelsien mill-arrest u talbitu jħallas €500 f'depożitu u €3,500 f'garanzija personali.