Żagħżugħ ta’ 17-il sena ngħata l-ħelsien mill-arrest wara li tressaq il-Qorti akkużat b’għadd kbir ta’ reati, fosthom li kien qiegħed isuq mingħajr liċenzja.
Iż-żagħżugħ, mill-Marsa, ġie arrestat wara li ħabat waħda u tajba bil-karozza misruqa li kien qiegħed isuq.
Pulizija kien infurmat dwar il-każ minn sewwieq ieħor li ż-żagħżugħ ħabat fih.
L-Ispettur Pierreguido Saliba spjega kif wara li baqa’ dieħel f’ħajt, iż-żagħżugħ inżamm milli joħroġ mill-vettura minn sewwieq ieħor.
Iż-żagħżugħ qed iwieġeb mhux ħati, fosthom dwar l-akkużi li seraq erba’ karozzi u li bihom ħabat u baqa’ sejjer.
L-inċidenti kollha seħħew fl-aħħar għaxart ijiem, bi tliet inċidenti jseħħu f'ġurnata waħda.
Iż-żagħżugħ kien akkużat ukoll li kiser ordni ta’ Probation u anke li kiser il-libertà kkundizzjonata mogħtija lilu fi Frar li għadda.
Ammetta biss li kien qiegħed isiru karozza misruqa.
L-Avukat tad-Difiża, Victor Bugeja, saħaq li ż-żagħżugħ għandu bżonn l-għajnuna waqt li talab li jiddiskuti fil-privat mal-Maġistrat il-problemi soċjali u mediċi tiegħu.
Il-Maġistrat ordna li jkun imħejji rapport soċjali dwar il-ħajja taż-żagħżugħ.
Iż-żagħżugħ kien ordnat jiffirma fl-għassa erba’ darbiet fil-ġimgħa, ma joħroġx bil-lejl u jħallas garanzija personali ta’ €2,000.