Is-sitwazzjoni fl-istrixxa ta’ Gaza kkalmat xi ftit wara li militanti Palestinjani laħqu ftehim ma’ Iżrael għal waqfien mill-ġlied.
Dan wara tmiem il-ġimgħa mimli ġlied u attakki fejn ġew sparati diversi missili minn militanti Palestinjani li għalihom irrispondew l-Iżraeljani.
Minn tal-inqas erba’ Iżraeljani u 23 Palestinjan tilfu ħajjithom.
Filwaqt li l-Iżrael għadha ma kkonfermatx il-waqfien mill-ġlied, il-militar daħħal fis-seħħ miżuri ta’ emerġenza biex jgħin lil dawk li jinsabu fin-nofsinhar tal-pajjiż.
Il-ġlied beda nhar il-Ġimgħa li għadda waqt protesta fuq l-assedju ta’ Gaza.
Skont ir-rapporti fuq midja internazzjonali, f’temp ta’ 48 siegħa, ġew sparati xejn inqas minn 690 il-missila lejn in-nofsinhar ta’ Iżrael.
Intant, dan kollu qiegħed iseħħ fi żmien li Iżrael, partikolarment Tel Aviv qed jilqa’ eluf ta’ turisti li marru apposta biex isegwu l-Eurovision Song Contest li se jsir il-ġimgħa d-dieħla.
Hekk kif f’dawn il-jiem, l-attenzjoni se tkun fuq dan il-pajjiż, hu mistenni li l-Prim Ministru Iżraeljan Benjamin Netanyahu jkompli jaħdem biex iżomm is-sitwazzjoni kalma, partikolarment bl-għajnuna tal-awtoritajiet Eġizzjani u dawk mill-Qatar li kienu strumentali biex intlaħaq dan il-qbil għall-waqfien mill-ġlied.
