Il-Prim Ministru Joseph Muscat, waqt konferenza tal-aħbarijiet, ikkonferma li l-bastiment Lifeline se jkun qed jiddaħħal f'Malta fis-sigħat li ġejjin u se jinżamm għall-investigazzjonijet kollha neċċessarji.
Il-234 immigrant ilhom jistennew abbord il-bastiment mill-Ħamis li għadda, bil-Gvern Malti jinsisti li se jaċċettahom biss jekk jinqasmu fost pajjiżi membri tal-Unjoni Ewropea.
Waqt il-konferenza, il-Prim Ministru Joseph Muscat qal li l-immigranti se jkunu qed jitqassmu fost tmien pajjiżi, jiġifieri Malta, Franza, l-Italja, il-Portugal, il-Lussemburgu, l-Irlanda, il-Beljum u l-Olanda.
Malli jasal f'Malta, aktar tard illejla, se jiskatta l-proċess ta' identifikazzjoni tal-immigranti u se tingħata l-għajnuna medika kollha neċessarja.
Minn hemm se tiibda investigazzjoni fuq il-kaptan tal-bastiment, li skont Malta u anke l-Italja, kiser il-liġijiet internazzjonali meta injora struzzjonijiet tal-awtoritajiet Taljani.
Kien għalhekk li Muscat insista li din il-kriżi nħolqot biss minħabba l-azzjonijet tal-kaptan.
Huwa rringrazzja lill-Gvern Taljan,
Aktar kmieni llum ngħata permess li l-bastiment Lifeline jidħol fl-ibħra Maltin biex jistkenn mill-maltemp.
"Napprezzaw id-deċiżjoni tal-Gvern" - L-Isqfijiet
Fi stqarrija konġunta, l-Isqfijiet Maltin faħħru d-deċiżjoni tal-Gvern li jagħti permess li l-vapur Lifeline biex jidħol f'Malta.
"Nifhmu li din ma kinitx ħidma ħafifa imma kien essenzjali li jsir dak kollu meħtieġ biex niggarantixxu li kull ħajja tiġi salvata," qalu l-Isqfijiet. "Minkejja ċ-ċokon tagħna għal darb'oħra pajjiżna għamel ġest kbir li nittamaw li pajjiżi wisq akbar minna jimitaw."
Temmew juru l-gratitudni tagħhom lejn dawk kollha li qed jieħdu sehem f'din l-operazzjoni umana, partikolarment lill-Forzi Armati.
L-istqarrija hija ffirmata mill-Arċisqof Charles Scicluna, l-Isqof ta' Għawdex Mario Grech u l-Isqof-Awżiljarju elett ta' Malta Joseph Galea Curmi.
