'Għolli l-mużika u jinqatagħlek id-dawl' - is-Sindku tal-Belt
Stħarriġ tal-Eurostat wera kif ir-residenti Beltin huma l-inqas kuntenti bil-livell tal-istorbju fost ir-residenti tal-ibliet kapitali Ewropej. Is-Sindku tal-Belt Valletta ma jaqbilx ma’ postijiet ta’ divertiment fiż-żoni residenzjali
minn Yendrick Cioffi
Is-Sindku tal-Belt Valletta, il-Professur Alexiei Dingli, qal mal-gazzetta ILLUM li sidien ta’ postijiet ta’ divertiment fil-Belt Valletta għandhom ikunu kostretti jinstallaw ‘Sound Meters’ li jaqtgħu awtomatikament id-dawl jekk l-istorbju f’dawn l-istabbilimenti jaqbeż ċertu livelli.
Din hija waħda mis-soluzzjonijiet li skont is-Sindku tista’ tnaqqas l-inkonvenjent tal-istorbju fuq ir-residenti Beltin minħabba ristoranti u bars li qed jinfetħu f’żoni residenzjali.
Dingli saħansitra qal li huwa kontra li jingħataw permessi għal stabbilimenti li jestendu l-imwejjed u d-divertiment fit-toroq residenzjali tal-Belt Valletta u appella biex iż-żona residenzjali Beltija tkun protetta minn dan l-iżvilupp.
54% tal-Beltin mhux kuntenti bl-istorbju fil-Belt
L-ILLUM tkellmet ma’ Dingli wara li stħarriġ tal-Eurostat wera kif fost ir-residenti tal-ibliet Kapitali Ewropej jew bliet kbar oħra, dawk Beltin huma l-inqas kuntenti bil-livell ta’ storbju fil-Belt Valletta.
Minkejja li l-Beltin huma magħrufa bħala nies li jafu jiċċelebraw, biżżejjed issemmi l-karnival u l-futbol, 34% tar-residenti Beltin wieġbu li ma huma kuntenti xejn bil-livell tal-istorbju fil-Belt Valletta. Jekk ma dawn wieħed iżid lil dawk li wieġbu “ftit li xejn kuntenti” bil-livell tal-istorbju, in-numru jitla’ għal 54% tar-residenti Beltin.
Dan ifisser li minkejja ċ-ċokon u l-limitazzjonijiet tal-Belt Valletta, ir-residenti Beltin huma inqas kuntenti minn dawk ir-residenti tal-ibliet li huma ħafna akbar, fosthom Madrid, Pariġi, Brussell, Amsterdam u saħanistra Londra.
Hawn ta’ min wieħed jagħmel parentesi żgħira u jispjega kif dan l-istħarriġ, ippubblikat ftit tal-jiem ilu, sar fl-2015 u fi żmien tliet snin, il-postijiet ta’ divertiment fil-Belt Valletta faqqsu bħall-flieles, biżżejjed tħares biss lejn Triq it-Teatru l-Antik u l-famuża Strada Stretta.
Il-Kunsill joġġezzjona għal kull ristorant jew bar fiż-żona residenzjali
Mistoqsi jekk jaħsibx li l-istorbju huwa waħda mill-problemi ewlenin tal-Belt Valletta, is-Sindku wieġeb fil-pożittiv u saħaq li l-Kunsill Lokali qed iżomm din is-sitwazzjoni taħt għajnejh u joġġezzjona meta jsir jaf li se jinfetaħ ristorant jew bar fiż-żona residenzjali.
Dingli saħaq li r-residenti qed iressqu diversi ilmenti għax fi kliemu “qed isofru” jew minħabba stabbilimenti li jdoqqu l-mużika għolja, b’uħud minnhom bla permess jew minħabba storbju li joħolqu persuni li joħorġu jiddevertu fuq barra tal-istabbilimenti, mingħajr l-ebda rispett lejn ir-residenti li jgħixu fil-viċin.
‘Min suppost qed jipproteġi l-Belt qed jagħlaq għajnejh’
Kien hawn li qal li minkejja l-ilmenti li ressaq il-Kunsill, ħafna drabi l-oġġezzjonijiet waqgħu fuq widnejn torox.
“Nies li suppost qegħdin hemm biex jipproteġu l-Belt qed jagħlqu għajnejhom u dan jista’ jwassal biex jirvina l-karattru uniku tal-Belt permezz ta’ żvilupp żejjed u bla rażan li ma jagħtix kas il-bżonnijiet tar-residenti li jgħixu fil-kapitali,” saħaq is-Sindku. “Għamilna bosta ilmenti u kellna numru ta’ laqgħat ma’ entitajiet differenti biex tinstab soluzjoni fuq il-problema tal-istorbju. Iżda dejjem issib dawk il-ftit sidien li jinjoraw il-ligi.”
Iżda x’jista’ jsir? Kif tista’ twaqqaf il-mijiet ta’ persuni li fi tmiem il-ġimgħa qed jagħżlu l-Belt Valletta biex iqattgħu ħin mal-familja jew il-ħbieb? Qabel l-introduzzjoni tas-‘Sound Meters’, għas-Sindku hemm soluzzjoni li hija ħafna aktar sempliċi. Saħaq li hemm bżonn infurzar serju mill-awtoritajiet biex jiżguraw li l-istabbillimenti jkunu konformi mal-liġi.
‘L-istorbju qed jaffettwa s-saħħa mentali tar-residenti’
Waqt li kkwota l-Kodiċi Kriminali, is-Sindku fakkar li l-liġi hija ċara u tonda: Huwa ħati ta’ kontravenzjoni kull min “bil-lejl, jikser il-mistrieħ tan-nies bi ħsejjes jew għajjat, jew b’mod ieħor.”
Qal ukoll li Malta hija nieqsa minn liġijiet fuq il-livell tal-istorbju jew inkella huma liġijiet limitati u kien għalhekk li appella biex tidħol fis-seħħ liġi aktar ħarxa fuq dawn l-abbużi, għax skontu, l-istorbju mhux qed joħloq biss inkonvenjent għar-residenti, iżda saħanistra qed jaffettwa ħażin is-saħħa mentali tagħhom.
Intant, wara li stħarriġ ieħor tal-Eurostat kien poġġa lil Malta bħala l-aktar pajjiż storbjuż fl-Unjoni Ewropea, kelliem għall-Ministeru għall-Ambjent, kien qal mat-Times of Malta li fil-futur qrib se jitressaq abbozz ta’ liġi biex tiġġieled it-tniġġis mill-istorbju.
Ma tistax torqod minħabba l-istorbju? X’għandek tagħmel?
Imma l-Kunsill se joqgħod b’idu fuq żaqqu u ma jagħmel xejn? Skont Alexiei Dingli, f’dan ir-rigward il-Kunsill Lokali jaħdem mill-qrib man-Noise Abatement Society of Malta (NASOM), tant li nħolqot proċedura sempliċi ħafna li tistipola x’għandu jagħmel resident meta jkollu ilment minħabba l-istorbju. Din hija bbażata fuq tliet passi:
- Djalogu: Tkellem ma’ min qed jagħmel l-istorbju. Ħafna drabi persuni jindunaw li qed jagħmlu wisq storbju u jdejqu n-nies meta xi ħadd jiġbdilhom l-attenzjoni
- Medjazzjoni: Jekk il-problema tippersisti, tkellem ma’ terzi persuni li jisimgħu x’għandek tgħid inti u anke lil min qed joħloq l-inkonvenjent, bil-għan li tinstab soluzzjoni. Importanti li qabel kollox il-problema tkun solvuta b’mod informali. F’każ li jkollok tieħu azzjoni legali, il-fatt li tkun aġġixxejt b’mod responsabbli se taħdem favur tiegħek.
- Irrapporta: Jekk ma jirnexxilekx bil-kelma t-tajba, tiħux il-liġi b’idejk iżda rrapporta lill-awtoritajiet ikkonċernati. Jekk l-istorbju huwa wara l-5pm, irrapporta lill-pulizija fl-għassa lokali.