F’konferenza tal-aħbarijiet indirizzata mid-Deputat Mexxej għall-Affarijiet tal-Partit Chris Cardona u mill-President tas-Sezzjoni Kunsilliera tal-Partit Laburista Mario Fava, intqal kif Simon Busuttil qed jiddefendi lil Michael Fenech Adami, ħu l-Viċi Kap tiegħu, Beppe Fenech Adami, anke jekk ħareġ kif bħala Sindku ta’ B’Kara wettaq irregolaritajiet finanzjarji fosthom billi ddeċieda kuntratti li jammontaw għall-eluf ta’ ewro waħdu mingħajr ma nforma lill-Kunsill.
Id-Deputat Mexxej għall-Affarijiiet tal-Partit saħaq li minkejja li l-Kap tal-Oppożizzjoni jitkellem ħafna fuq governanza, meta jkun affaċċjat b’każijiet bħal dawn huwa ma jagħmel xejn, anzi agħar minn hekk, joħroġ jiddefendi. Simon Busuttil huwa lest li jiddefendi lil ħu l-Viċi Kap tiegħu, Beppe Fenech Adami, l-istess familja Fenech Adami li hija b’saħħitha aktar mill-istess Simon Busuttil, tenna Dr Chris Cardona.
Il-Ministru Cardona stqarr li under his watch għall-Kap tal-Oppożizzjoni tfisser li ma jieħux azzjoni u qed jibqa’ jagħżel li jiddefendi lil Beppe Fenech Adami u l-arroganza. Id-Deputat Mexxej Laburista fakkar fil-każ ta’ ħut Chris Said fin-Nadur fejn hemmhekk ukoll Simon Busuttil ma ħax azzjoni.
Dr Cardona tkellem fuq kif il-Kap tal-Oppożizzjoni joħroġ jattakka lil kull istituzzjoni li ma tgħidx dak li jkun irid jisma’ hu fejn saħansitra sa dalgħodu stess, Beppe Fenech Adami ħareġ jattakka lill-Kummissarju tal-Pulizija, lill-Avukat Ġenerali u lil Bord tal-Governanza li sab li ħuħ wettaq għadd ta’ irregoralitajiet finanzjarji. Fuq l-istess Bord ta’ Governanza, Chris Cardona staqsa jekk il-Partit Nazzjonalista għandux fiduċja f’Dr Noel Bartolo li jmexxi l-imsemmi Bord, Bord li tant intuża mill-media tal-PN meta kien hemm rapporti fuq Sindki Laburisti.
Min-naħa tiegħu Mario Fava saħaq li huma double standards tal-Kap tal-Oppożizzjoni u l-Partit tiegħu li jattakkaw lill-Bord tal-Governanza issa meta propju użaw tant l-istess Bord meta kien hemm rapporti fuq Sindki Laburisti. Il-President tas-Sezzjoni Kunsilliera spjega kif Michael Fenech Adami huwa l-preferut tal-Partit Nazzjonalista mhux biss għax qed jiddefenduh, iżda għax filwaqt li kienu qed jitkeċċew il-ħaddiema tal-Partit Nazzjonalista, huwa daħal jaħdem id-Dar Ċentrali.
Mario Fava saħaq li huwa ċar daqs il-kristall li Michael Fenech Adami ma segwiex regolamenti finanzjarji li jirregolaw lill-Kunsilli Lokali fejn ġieli ddeċieda fuq kuntratti anke b’mod verbali mingħajr kitba ta’ xejn. Iżda filwaqt li sar dan kollu, il-Partit Nazzjonalista ħareġ jiddefendi lil Michael Fenech Adami u skredita l-Bord ta’ Governanza. Dan huwa test ieħor li Simon Busuttil falla għax naqqas milli jieħu azzjoni, temm jgħid il-President tas-Sezzjoni Kunsilliera tal-Partit Laburista.