Il-Professur Godfrey Pirotta fetaħ baraxx kritika permezz tal-paġna tiegħu ta' Facebook illi fiha saħaq li huwa inutli li nagħmlu referendum biex imbagħad naċċettawh biss meta r-riżultat ikun jogħġobna. "Ikun għalxejn", sostna Pirotta, "li jkollna referendum jekk imbagħad tiddeċiedi tinjorah". Huwa kien qed jirreaġixxi għal sentiment lokali u madwar l-UE ta' dubji li qamu fir-rigward tar-referendum li sar fir-Renju Unit.
"Ma tistax taqbel ma' riżultat ta' referendum meta jikkonforma ma' dak li jogħġob lilek biss" qal Pirotta illi fakkar kif minkejja li hu ma kienx kuntent bir-referendum li sar f'Malta dwar il-kaċċa xorta aċċetta r-riżultat. "Minn naħa l-oħra jien kont kuntent bir-riżultat tar-referndum tad-divorzju u xxukkjat li l-Gvern ta' dakinhar seta' ma kienx qed jaċċettah." Il-Professur Pirotta kompla jgħid li jekk mhux se jkun hemm rispett għal riżultat ta' referendum għax ma jikkonformax ma dak li naħsbu "naqbu u ma nagħmlux iktar referendums."
ir-riżultat seta' kien wieħed minn tnejn biss, jibqgħu jew jitilqu mill-UE. Ir-riżultat ħareġ, għixu bih.
Profs Godfrey Pirotta
Huwa saħaq li r-riżultat tar-referendum fir-Renju Unit jeħtieġ ikun rispettat, "il-partiti kollha aċċettaw li jsir referendum għax din kienet wegħda elettorali tal-Partit Konservattiv, ir-riżultat seta' kien wieħed minn tnejn biss, jibqgħu jew jitilqu mill-UE. Ir-riżultat ħareġ, issa għixu bih."
Il-Professut Pirotta temm jgħid li riżultat bħal dak ta' din il-ġimgħa ma joħroġx mix-xejn, "ilu ġej u xi politikanti illum huma xxukkjati filwaqt li nsew li kienu huma stess li kkontribwew għar-riżultat. Ħafna drabi kienu huma li weħħlu fl-UE għall-fallimenti tagħhom. Issa, qed jaħsdu dak li żergħu."