lbieraħ filgħaxija, ftit wara d-9.30pm, il-Pulizija kienu informati li kienet seħħet sparatura fi Triq il-Buskett fl-inħawi ta’ San Blas bejn is-Siġġiewi u Ħaż-Żebbuġ fejn ħalliet raġel mejjet. Il-vittma, Raymond Caruana ta’ 53 sena minn Ħaż-Żebbuġ, kien involut fl-allegat tixħim tal-Imħallef Ray Pace sentejn ilu.
L-ewwel ma waslu fuq il-post kienu l-Pulizija mill-Iskwadra tar-Rapid Intervention Unit fejn qrib razzett sabu Jeep Wrangler bil-ħġieġ imkisser u ftit passi ’l bogħod kien hemm Caruana mitluq fl-art mejjet.
B’dan it-tieni qtil ta’ din is-sena ġew informati l-Pulizija mid-Dipartiment tal-Investigazzjonijiet Kriminali kif ukoll tad-Distrett. Fi ftit ħin marru fuq il-post id-Deputat Kummissarju Pierre Calleja, l-Assistent Kummissarju Silvio Valletta flimkien mal-Ispettur Keith Arnaud mill-Iskwadra tal-Omiċidji kif ukoll l-Ispetturi James Grech u Michael Mallia. Min-naħa tad-Distrett kien hemm l-Assistent Kummissarju Neville Aquilina flimkien mal-Ispetturi Kevin Farrugia u Kyle Borg u uffiċjali oħrajn.
Peress li tħallejna aktar minn 200 metru ’l bogħod, kien id-dlam u ma kien hemm ħadd biex jagħtina l-ewwel informazzjoni, xogħolna l-ġurnalisti preżenti kien diffiċli ħafna. Minn dak li b’xi mod stajna naraw, jidher li l-qattiel kien qed jistenna fi trejqa faċċata tad-daħħla tar-razzett fejn kien Caruana flimkien ma’ mara li fil-ħin tal-isparatura x’aktarx li kienet ġewwa u li kienet hi li ċemplet lill-Pulizija.
Jidher li kif Caruana kien ħiereġ bil-Jeep tiegħu, il-qattiel ħareġ minn fejn kien moħbi u spara numru ta’ tiri wara xulxin. Minkejja li kien ferut gravi, Caruana rrnexxielu joħroġ mill-vettura, imma kif għamel ftit passi, jew waqa’ u miet jew il-qattiel kompla jispara. Fil-fatt l-Uffiċjali tax-Xena tar-Reat immarkaw mill-inqas 33 post ta’ traċċi li nemmnu li ħafna minn dawn, jekk mhux kollha, huma skrataċċ li jindika li l-arma li ntużat tista’ tkun xi tip ta’ machine gun. Mhux eskluż li seta' kien hemm aktar minn qattiel wieħed u li ġew sparati bejn 40 u 50 tir.
B’dan il-qtil ġiet informata l-Maġistrat Dr Gabriella Vella li marret fuq il-post fejn mexxiet l-aċċess u ħatret diversi esperti fosthom lit-Tabib Forensiku Mario Scerri, lill-Perit Richard Aquilina flimkien mal-esperti ballistiċi.
Minkejja li hemm installati cameras tas-sigurta, nifhmu li ftit li l-filmati ftit li xejn juru x’ġara.
Fl-2012 Raymond Caruana kien akkużat flimkien ma’ Sandro Psaila ta’ 43 sena mill-Belt li ppruvaw jikkorrompu lill-Imħallef Raymond Pace bil-għan li tiżdied sentenza fil-konfront ta’ Darren Charles Desira minn Ħaż-Żebbuġ. Desira kien ingħata sentenza ta’ 18-il sena ħabs u multa ta’ €46,000 wara li ammetta l-involviment tiegħu fl-importazzjoni tad-droga kokaina.
Aktar dettalji dwar dan it-tieni omiċidju kif jidħlulna.
