Is-Segretarju Ġenerali tal-Ġnus Magħquda (UN), António Guterres iddikjara li l-2023 se tkun l-aktar sena sħuna fl-istorja tal-bniedem, filwaqt li nnota li, "qegħdin ngħixu f’ kollass tal-klima fl-istess ħin.”
Guterres kien qed jindirizza s-summit tal-COP28 dwar il-klima fl-Emirati Għarab Magħquda (UAE), wieħed mill-akbar pajjiżi li jipproduċu ż-żejt fid-dinja.
Huwa ddikjara li r-rekord għandu jasal lil kull mexxej tad-dinja filwaqt li talab lill-komunità internazzjonali biex taġixxi u twettaq il-wegħdiet tagħha dwar il-klima.
Ir-rimarki tiegħu ħabtu mat-tħabbira tal-Organizzazzjoni Dinjija Meteoroloġika li l-2023 żgur li se tikser ir-rekord tat-temperatura globali.
Minkejja dan, hemm tħassib li l-mudell tat-temp ta’ ‘El Niño’ jista' jagħmel l-2024 ħafna aktar sħun.
F’diskors, Guterres innota li l-livelli tas-silġ tal-baħar fl-Antartiku waqgħu għal livell baxx rekord u li l-livelli tal-baħar u t-temperaturi tal-wiċċ tal-baħar laħqu livelli rekord.
Il-president tal-COP ta’ din is-sena huwa Sultan al-Jaber, li jmexxi wkoll in-negozju nazzjonali enormi taż-żejt fl-Emirati Għarab Magħquda. Huwa stqarr li n-nazzjonijiet għandhom iwiegħdu li jnaqqsu l-emissjonijiet tagħhom saħansitra aktar u jikkooperaw biex jirdoppjaw l-effiċjenza tal-enerġija u jirdoppjaw il-kapaċità tas-sorsi tal-enerġija rinnovabbli.
Skont Jaber, numru ta’ kumpaniji kbar taż-żejt u tal-gass waslu biex jieħdu deċiżjoni sabiex jeliminaw kompletament l-emissjonijiet tal-metan sal-2030.
Sabiex jipprevjeni lill-pajjiżi li qed jiżviluppaw milli jkollhom jagħżlu bejn it-tkabbir u l-azzjoni klimatika, huwa ddikjara wkoll li l-UAE se tkun qed tagħti sehemha b’mod finanzjarju.
