Diversi kliniċi tal-abort bdew jagħlqu l-bibien tagħhom f’numru ta' stati tal-Istati Uniti wara li sentenza tal-Qorti Suprema, ilbieraħ, neħħiet id-dritt kostituzzjonali tan-nisa Amerikani għall-abort.
Madwar nofs l-Istati mistennija jintroduċu restrizzjonijiet jew projbizzjonijiet ġodda wara li l-Qorti bidlet id-deċiżjoni tagħha ta’ Roe v Wade wara kważi 50 sena.
13-il stat kellhom dawk li huma sejħu bħala 'Trigger Laws' li jaraw l-abort projbit fi żmien 30 ġurnata, il-mument li din id-deċiżjoni ttieħdet.
Fl-ewwel reazzjoni tiegħu, il-President Joe Biden iddeskriva s-sentenza bħala "żball traġiku" filwaqt li persuni favur il-ħajja ċċelebraw quddiem il-Qorti.
X'inhu l-każ Roe v Wade?
Fl-1969, mara ta’ 25 sena, Norma McCorvey bl-użu tal-psewdonimu “Jane Roe”, sfidat il-liġijiet kriminali dwar l-abort f’Texas. L-istat ipprojbixxa l-abort bħala mhux kostituzzjonali, ħlief f’każijiet fejn il-ħajja tal-omm kienet fil-periklu.
Jiddefendi din il-liġi kontra l-abort kien hemm Henry Wade - l-avukat tad-distrett għal Dallas County - għalhekk Roe v Wade.
McCorvey kienet tqila bit-tielet wild tagħha meta ressqet il-każ, u sostniet li kienet ġiet stuprata. Iżda l-każ ġie miċħud u hija ġiet imġiegħla twelled.
Fl-1973 l-appell tagħha sar quddiem il-Qorti Suprema tal-Istati Uniti, fejn il-każ tagħha nstema’ flimkien ma’ dak ta’ mara minn Ġeorġja ta’ 20 sena, Sandra Bensing.
Flimkien sostnew li l-liġijiet tal-abort f’Texas u l-Ġeorġja marru kontra l-Kostituzzjoni tal-Istati Uniti għax kisru d-dritt tal-privatezza tal-mara.
B’vot ta’ sebgħa kontra tnejn, l-imħallfin tal-Qorti dakinhar iddeċidew li l-Gvernijiet ma kellhomx is-setgħa li jipprojbixxu l-aborti. Huma iġġudikaw li d-dritt ta’ mara li ttemm it-tqala tagħha kien protett mill-Kostituzzjoni tal-Istati Uniti.
