Intervista Lokali Barranin

Floriana jiksbu t-tielet rebħa konsekuttiva fil-konfront dirett kontra Balzan

Balzan       0

Floriana    3

Cristian Muscat / 10 ta' Marzu 2015 12:21
Matthew Calleja Cremona fit-tentattiv li jipprova jirbaħ il-ballun minn fuq ras Bojan Kaljevic
Floriana kkonvinċew bil-kbir, meta fil-konfront dirett kontra Balzan għelbuhom bl-iskor komdu ta’ 3-0, b’Matteo Piciollo jkun l-eroj assolut għalihom hekk kif skorja doppjetta personali. 

Permezz ta’ din ir-rebħa Floriana resqu punt biss taħt l-arċi-rivali eterni Valletta għalkemm lagħbu logħba iktar minnhom, bil-Beltin ikunu mpenjati llum kontra Tarxien Rainbows. Min-naħa l-oħra bdew jidhru x-xquq għal Balzan hekk kif tilfu żewġ logħbiet mill-aħħar erbgħa li kienu involuti fihom.

Il-Greens resqu viċin li jiftħu l-iskor fl-20 minuta meta Amadou Samb għadda tajjeb lejn Matteo Piciollo li kellu xutt fil-baxx milqugħ tajjeb mill-goalkeeper Għawdxi Steve Sultana. Floriana marru fil-vantaġġ fit-42 minuta meta minn kross ta’ Vito Plut mix-xellug, Matteo Piciollo tefa’ ġewwa permezz ta’ daqqa ta’ ras tajba. 

Seba’ minuti mill-ftuħ tat-tieni taqsima, il-Greens irduppjaw l-iskor meta minn kross ta’ Steve Pisani mil-lemin, xutt mill-ewwel tal-plejer Taljan Matteo Piciollo ma ta l-ebda ċans lill-goalkeeper ta’ Balzan. Floriana ssiġġillaw ir-rebħa permezz tat-tielet gowl fil-logħba fis-76 minuta meta minn freekick ta’ Steve Pisani, il-ballun spiċċa għand l-eks plejer żagħżugħ ta’ Chievo Verona fl-Italja, Conor Borg li mill-viċin tefa’ ġewwa. 

Balzan - Sultana, Grioli, Grima (Agius 69’), Guerrero, Bilbao Zarate (Darmanin 57’), Bezzina, Kaljevic, Guobadia, Arab, Mifsud Triganza (Micallef 57’), Serrano Valero

Floriana - Calleja Cremona, Moreira Cobo, Emerson, Pisani, Plut (S. Borg 90’), Piciollo, Conor Borg, Briffa, Samb (Coronado 77’), Micallef, Bonnici (Clyde Borg 73’)

Referi - Esther Azzopardi

Matte Piciollo

Ġie vvutat bħala l-BOV Plejer tal-Logħba mill-ġurnalisti preżenti għat-tielet darba konsekuttiva

Twieled fil-15 ta’ Ottubru 1992 fl-Italja

Qed ikollu staġun mill-aqwa ma’ Floriana

Qabel ingħaqad ma’ Floriana, huwa lagħab ma’ AS Ostiamare, Civitavecchia, Salernitana u Atletico Roma Jugend fl-Italja

Cristian Antony Muscat huwa ġurnalist sportiv li jispeċjalizza fil-futbol. Ilu f’dan il-qasam għal dawn l-aħħar 5 snin. Kien kummentatur f'diversi logħbiet prinċipali tal-futbol fosthom dawk mill-UEFA Champions League kif ukoll tal-waterpolo, handball u futsal. Għandu għal qalbu ħafna l-isports hekk kif jarah bħala mezz ewlieni li jgħin lill-bniedem biex jiskopri dejjem iktar lilu nnifsu.
Stħarriġ
Segwina fuq Facebook