Il-Kummissjoni Ewropea nediet proċeduri ta’ ksur fil-konfront ta’ Malta talli naqset milli tittrasponi direttiva li tirregola l-ħin tax-xogħol fis-settur tat-trasport tagħha fil-passaġġi tal-ilma interni – settur li ma jeżistix fil-gżira żgħira.
Il-Kummissjoni bagħtet ittri ta' avviż formali lill-Greċja, Ċipru u Malta nhar il-Ħamis, fejn appellathom biex jittrasponu d-Direttiva dwar il-ħin tax-xogħol fit-trasport fuq l-ilma interni.
Id-Direttiva tirregola ċerti aspetti tal-ħin tax-xogħol għall-ħaddiema impjegati abbord bastimenti fi xmajjar, lagi u kanali navigabbli.
Fi stqarrija għall-istampa, il-Kummissjoni rrikonoxxiet li mhux l-istati membri kollha għandhom passaġġi fuq l-ilma interni fit-territorju tagħha.
Minkejja dan, il-Kummissjoni qalet li traspożizzjoni uniformi tad-direttiva hija importanti biex jiġi żgurat li l-kuntratti ta’ impjieg individwali ta’ ħaddiema bħal dawn ikunu f’konformità sħiħa mad-dispożizzjonijiet tad-Direttiva.
It-tliet pajjiżi tal-Mediterran għandhom xahrejn biex javżaw lill-Kummissjoni bil-miżuri nazzjonali tagħhom. Jekk il-pajjiżi jonqsu milli jipprovdu tweġiba sodisfaċenti, il-Kummissjoni tista' tieħu l-passi meħtieġa.