Waqt li kien qed jiġi intervistat fuq l-istazzjon ONE il-Prim Ministru Robert Abela reġa sostna li Malta mhux se ddaħħal aktar immigranti u pajjiżna lanqas jista' jiggarantixxi li fil-fatt joħroġ għal salvataġġ. Huwa qal li din hija deċiżjoni bla preċedent meħuda fi żmien ta' gwerra u allura hija proporzjonata. Madanakollu ametta li hija deċiżjoni diffiċli li jaf ikollha riperkussjonijiet.
Huwa qal li jekk l-UE mhux lesta tgħin lil Malta "aħna lesti li niddefendu xtutna."
"Din id-dgħajsa," sostna b'referenza għad-dgħajsa li daħlet ilbieraħ, "daħlet b'eċċezzjoni għax fil-mument li ħadna deċiżjoni bħala Kabinett kienet diġa' fiż-żona ta' Tfittxija u Salvataġġ (SAR) u mhux se jiġu aċċettati aktar bastimenti. Mhux qed nagħmlu U turn."
Fakkar li lura fit-3 ta' April il-Gvern iddeċieda li kull vapur bl-immigranti jrid imur fejn dak il-bastiment tal-NGOs huwa reġistrat u sostna li l-Gvern, din id-deċiżjoni ma biddiliex.
"Minħabba ċ-ċikorstanza eċċezzjonali qed nieħdu miżuri."
Dwar l-imxija tal-Covid-19 huwa qal li hemm bżonn id-dixxiplina u saħaq li jekk kulħadd se joħroġ u jmur fil-bajjiet, il-Gvern se jżid il-miżuri. Qal li l-ġimgħatejn li ġejjin se jkunu kruċjali.
'Ixxukkjati'
Intant numru ta' għaqdiet qalu illi d-deċiżjoni tal-Gvern li jagħlaq il-portijiet - xi ħaġa li ħabbar ilbieraħ wara li daħlet dgħajsa bl-immigranti - hija xokkanti u se tfisser jew li nies jitħallew fil-baħar għal ġranet sħaħ jew ġimgħat "jew inkella r-ritorn tagħhom fil-Libja fejn jiffaċċjaw ksur sfaċċat tad-drittijiet tagħhom."
Dawn l-għaqdiet non governattivi qalu li hija "inaċettabbli" li l-Gvern, skonthom, ipoġġi fuq l-ixkaffa l-obbligazzjonijiet umani tiegħu.
Fi stqarrija huma qalu li jifhmu l-isfidi tal-pajjiż minħabba l-Covid-19 u fakkru li huwa dmir ta' kulħadd li jobdi lill-awtoritajiet. Qalu iżda illi l-emerġenza ta' bħalissa mhijiex raġuni tajba biżżejjed biex il-Gvern ma jonorax l-obbligi tiegħu.
"Nibżgħu li Malta qed tuża din il-kriżi biex iċċaħħad lill-immigranti mid-dinjità tagħhom."