'F200 ċella fil-ħabs hemm aktar minn priġunier wieħed' - Fenech Adami
Il-PN jipproponi li priġunieri li waslu biex itemmu s-sentenza tagħhom ikomplu dan permezz ta' house arrest 'biex jitnaqqas l-iffullar'
minn Albert Gauci Cunningham
Meta kien qed jitkellem waqt konferenza tal-Aħbarijiet il-Kelliem għall-Intern tal-Partit Nazzjonalista Beppe Fenech Adami ppropona - f'isem il-Partit Nazzjonalista - illi biex jitnaqqas l-iffullar fil-ħabs jiġu identifikati priġunieri anzjani u li allura huma aktar vulnerabbli u jitpoġġew f'żona fil-ħabs għalihom jew inkella, saħansitra jitpoġġew f'binja diffferenti b'mod temporanju. Din il-proposta qed issir hekk kif, skont Fenech Adami, l-inkwiet u tħassib fost il-priġunieri qed jikber minħabba ffullar u l-fatt li ma jistgħux iżommu distanza soċjali.
Il-PN qed jipproponi wkoll li dawk il-priġunieri li waslu biex jispiċċaw is-sentenza tagħhom, ikompluha fuq house arrest billi tintuża teknoloġija biex dan ikun assigurat.
Fenech Adami fakkar illi minn ftit aktar minn 400 ċella, f'200 minnhom hemm aktar minn priġunier wieħed.
