Illejla, il-Prim Ministru Robert Abela, bi qbil mal-imsieħba soċjali kollha, ħabbar pakkett ta’ miżuri li jkompli ma’ dak imħabbar il-ġimgħa li għaddiet, liema pakkett ta’ miżuri se jkun ifisser nefqa ta’ madwar €65 u €70 miljun kull xahar.
Kif żvela s-sit illum.com.mt, il-Gvern se jkun qed iħallas €800 fix-xahar għal kull ħaddiem li jaħdem fis-setturi li ġew l-aktar milquta mill-Covid-19 u l-miżuri li ttieħdu biex l-imxija tkun ikkontrollata.
Il-ġimgħa li għaddiet, il-Gvern kien se jagħmel tajjeb għal sa jumejn xogħol ibbażat fuq paga ta’ €800 fix-xahar, iżda issa, b’dan il-pakkett aġġornat, il-Gvern se jkun qed iħallas sa ħamest ijiem xogħol u b’hekk se jagħti €800 fix-xahar.
Din il-miżura se tolqot 60,000 impjegat u se tiswa lill-Gvern €44.
Liema huma s-setturi meqjusa kritiċi?
Dawk is-setturi li huma meqjusa l-aktar milquta u li għan-negozji fihom il-Gvern se jkun qed jiggarantixxi t-€800 fix-xahar għal kull ħaddiem huma:
- Wholesale
- Bejgħ bl-imnut (Retail)
- Akkomodazzjoni
- Ristoranti u barijiet
- Kiri ta’ vetturi
- Aġenziji tal-ivjaġġar, gwidi u attivitajiet relatati
- Attivitajiet marbuta mas-sigurtà
- Manutenzjoni
- Trasport
- Arti kreattivà u divertiment
- Attivitajiet personali (bħalma huma l-hairdressers)
Għajnuna lil setturi oħra miltuqa
Għan-negozji f'setturi oħra, li wkoll intlaqtu b’mod negattiv mill-imxija tal-Covid-19 u l-miżuri biex din tkun ikkontrollata, il-Gvern se jkun qed jagħtihom ġurnata ħlas għal kull ħaddiem ibbażat fuq €800 fix-xahar, biċ-ċans li din saħansitra titla’ wkoll għal jumejn.
Din il-miżura se tolqot 50,000 ħaddiem u se tiswa €17-il miljun.
Liema huma s-setturi l-oħra li qed jgħin il-Gvern?
Is-setturi/negozji li għalihom il-Gvern se jkun qed jiggarantixxi sa jumejn xogħol (fuq paga ta’ €800 fix-xahar) huma:
- Manifattura
- Wholesale (parti minn)
- Retail (parti minn)
- Warehouse
- Informazzjoni
U l-Għawdxin se jibbenefikaw?
Apparti li l-Għawdxin se japplikaw anke għall-miżura tat-€800 fix-xahar, għal dawk il-ħaddiema Għawdxin fis-setturi l-oħra milquta (ara hawn fuq), il-Gvern se jagħmel tajjeb għal jumejn xogħol (mhux ġurnata) ibbażati fuq €800 fix-xahar.
U s-self employed?
Għal dawk li huma self-employed (u li n-negozju tagħhom jaqgħu fis-setturi oħra msemmija aktar 'il fuq) u li jħaddmu n-nies magħhom, flok jumejn, se jingħataw għajnuna għal tlett ijiem xogħol.
U għal min jaħdem part-time?
Kif spjegat, l-għajnuna għal dawk li jaħdmu fuq bażi full-time se tkun ta’ €800 fix-xahar. Għal dawk part-time, il-Gvern se jkun qed iħallas €500 fix-xahar għal kull ħaddiem.
Dawk li qed jaħdmu fuq ġurnata jew tnejn jieħdu €100 jew €200 rispettivament.
Allura min iħaddem se joqgħod b’idu fuq żaqqu?
Assolutament mhux hekk. Ma jfissirx li l-Gvern se jħallas it-€800 u l-impjegaturi ma jiggarantixxu xejn.
Bi qbil bejn l-imsieħba soċjali kollha, jiġifieri bejn il-unjins u min iħaddem, l-impjegaturi se jkunu wkoll qed jiggarantixxu minimu ta’ €400 fix-xahar, biex hekk il-ħaddiema (fis-setturi imsemmija), ikollhom dħul ta’ (minn tal-inqas) €1,200.
F’każ li impjegatur ma jkunx se jlaħħaq ma din il-garanzija, irid jikteb lid-Dipartiment tar-Relazzjonijiet Industrijali u jispjega, fid-dettall, għaliex.
Kif tista’ tagħmel biex tapplika?
L-applikazzjonijiet għas-setturi li huma eliġibbli jistgħu jinkisbu minn fuq covid19.maltaenterprise.com
Dak li tħabbar il-ġimgħa li għaddiet jibqa' japplika?
Iva. Dak li tħabbar il-ġimgħa li għaddiet jibqa’ japplika.
Il-ġimgħa li għaddiet il-Gvern ħabbar il-posponiment tal-ħlasijiet tat-taxxa tad-dħul (income tax), tal-bolla u tal-VAT. Il-ħlasijiet dovuti għal Marzu u April se jsiru f’data oħra. Dawn se jfissru €700. Il-Gvern se jkun qed jara jekk ikunx meħtieġ posponiment ta’ xhur oħrajn biex jgħin aktar lill-industrija.
Il-Gvern kien ħabbar ukoll li:
- Il-Gvern se jgħin lil dawk il-ġenituri li jaħdmu t-tnejn fis-settur privat u li wieħed minnhom ikollu jibqa’ d-dar biex jieħu ħsieb it-tfal, billi jagħti €800 fix-xahar lil wieħed minnhom. Din il-miżura se tolqot 12,000 familja u se tiswa €19-il miljun fuq xahrejn
- Persuni b’diżabilità li jaħdmu fil-privat u li huma rreġistrati ma’ Jobsplus u li minn jeddhom jagħżlu li jibqgħu d-dar, għax ikunu aktar vulnerabbli għall-Covid-19, se jkunu wkoll qed jibbenefikaw minn €800 fix-xahar. Din il-miżura se tiswa €2 fuq xahrejn.
- Dawk il-persuni li ġew, jew li se jispiċċaw bla xogħol (mid-9 ta’ Marzu ‘l quddiem), konsegwenza tal-Covid-19, ukoll se jkunu qed jirċievu €800 fix-xahar, apparti l-benefiċċju tal-qgħad.
Dawn il-miżuri japplikaw għall-impjegati u anke għas-self-employed, inkluż dawk li jaħdmu fuq bażi part-time. Se jkun hemm applikazzjoni separata għal kull miżura u l-individwi għandhom japplikaw onlajn mis-sit tad-Dipartiment Soċjali jew servizz.gov. Aktar informazzjoni tinkiseb minn fuq in-numru 153.
