Meta kien qed jindirizza konferenza tal-aħbarijiet il-Kap tal-Oppożizzjoni u tal-Partit Nazzjonalista Adrian Delia reġa sostna illi jekk isir lockdown ma jibqgħux jiżdiedu l-każi. "Għalfejn qed tbeżża' bil-lockdown jekk dan xorta se jkollna nagħmluh?" staqsa Delia. "Vera li hemm il-konsegwenzi, imma l-konsegwenzi tat-tixrid tal-mard huwa agħar."
Adrian Delia qal illi "l-Oppożizzjoni mill-ewwel ħadet pożizzjoni ċara li f'dan il-każ m'hawnx politika partiġġjana. Sfortunatament il-Gvern lanqas biss aċċetta li niddiksutu fil-Parlament is-sitwazzjoni fil-pajjiż. Nibqa' nżomm ma' din il-pożizzjoni," qal Delia li żied jgħid illi l-Parlament Malti huwa l-unika wieħed fid-dinja li ma ddiskutiex din il-problema u l-isfida u kif se jingħaqdu flimkien il-forzi kollha kontra l-Covid-19.
Reġa' fakkar fil-bżonn li tingħata għajnuna lill-anzjani kollha u l-għajnuna lill-infermiera.
Il-Kap tal-PN qal li huwa importanti li jkunu salvagwardjati t-tfal u sostna illi l-Gvern jeħtieġ jispjega illi dawn ma jitħalltux fil-postijiet tal-ikel u fil-playgrounds. "Lill-anzjani inwasslulhom l-ikel fid-djar tagħhom, il-ħaddiema tal-Gvern - la hemm it-teknoloġija - jistgħu jaħdmu kollha d-dar fis-serħan il-moħħ."
Huwa għamel referenza għall-miżuri li ħabbar il-Gvern u saħaq illi dawn mhumiex immirati għall-kumpaniji żgħar li jħaddmu ftit nies. "Tkeċċew mijiet ta' nies diġa' mill-impjieg tagħhom ... u hawn Malta l-Ministri jiftaħru b'pakketti li huma għamad."