Is-Soċjalisti rebħu l-Presidenza tal-Parlament Ewropew hekk kif il-kandidat David-Maria Sassoli, Taljan, ġab il-maġġoranza tal-voti.
B'kollox, ivvutaw 704 Membru tal-Parlament Ewropew, mill-voti mitfugħa 667 kienu validi u l-kwota kienet dik ta' 334 vot.
Wara li l-ewwel votazzjoni ma tat l-ebda riżulatati, Sassoli kiseb 345 vot wara t-tieni rawnd ta' votazzjoni.
Minnufih, Antonio Tajani ċeda postu lil David-Maria Sassoli li ħa f'idu l-Presidenza ta' din l-istituzzjoni importanti tal-Unjoni Ewropea għas-sentejn li ġejjin.
Apparti Sassoli, ikkontestaw ukoll Ska Keller għall-Ħodor, Sira Rego tax-Xellug u Jan Zahradil għall-Konservattivi.
Intant, ilbieraħ, il-Mexxejja Ewropej għażlu lill-Ġermaniża Ursula Von Der Leyen biex tmexxi il-Kummissjoni Ewropea għat-terminu li jmiss u tieħu post Jean Claude Juncker.
Apparti minn hekk, Charles Michel inħatar President tal-Kunsill Ewropew, liema kariga kien imsemmi għaliha wkoll il-Prim Ministru Joseph Muscat.