Il-gazzetta ILLUM tista’ tiżvela kif l-eks Kap tal-Oppożizzjoni Simon Busuttil kien lest li jirriżenja wara l-elezzjonijiet tal-Parlament Ewropew tal-2014, meta l-Partit Nazzjonalista ftit li xejn irnexxielu jbiddel id-distakk ta’ aktar minn 36,000 li bih tilef l-elezzjoni ġenerali tal-2013.
Kienu Deputati tal-Partit Nazzjonalista li kkonfermaw ma’ din il-gazzetta kif Busuttil tant kien ċert li se jirriżenja li kien laħaq kiteb l-ittra tar-riżenja u biddel fehmtu biss wara li l-Partit Nazzjonalista rebaħ it-tielet siġġu fil-Parlament Ewropew.
Propju għalhekk li l-istess Deputati u oħrajn, qed jistennew u jisħqu li Adrian Delia għandu jagħmel l-istess ġaladarba l-Partit Nazzjonalista mhux talli tilef it-tielet siġġu talli d-distakk tal-elezzjoni ġenerali tal-2017 kompla jiżdied bi 3000 vot.
L-elezzjoni tal-Parlament Ewropew tal-2014 kienet l-ewwel test politiku għal Simon Busuttil li ftit xhur wara li kien ħa t-tmun tal-Partit Nazzjonalista wara t-telfa kbira li dan kien ġarrab fl-Elezzjoni Ġenerali tal-2013, meta l-Partit Laburista rebaħ il-Gvern b’distakk ta’ 35,107 voti.
Jidher li Simon Busuttil xejn ma kien kuntent bir-riżultat li ġab il-Partit Nazzjonalista fl-elezzjoni tal-Parlament Ewropew tal-2014 u dan minkejja li d-distakk mhux talli ma kienx żdied talli kien naqas bi ftit għal 33,677 vot.
Fil-fatt, Deputati Nazzjonalisti li tkellmu ma’ din il-gazzetta żvelaw kif Simon Busuttil kien lest li jirriżenja wara dan ir-riżultat u saħansitra kien laħaq kiteb l-ittra tar-riżenja, informazzjoni li sal-lum baqgħet qatt ma kienet pubblika.
Deputat minnhom spjega mal-ILLUM kif Busuttil kien intalab jistenna li jintemm il-proċess kollu tal-għadd tal-voti, li bis-sistema l-antika, kien ħa madwar tlett ijiem.
“Busuttil biddel fehmtu biss meta fl-aħħar ħin il-Partit Nazzjonalista kien irnexxielu jeleġġi t-tielet siġġu fil-Parlament Ewropew. Din kienet xi ħaġa pożittiva għall-partit,” insista l-istess Deputat.
L-ILLUM, bagħtet tistaqsi lil Busuttil u talbitu jikkonferma din l-informazzjoni. Filwaqt li ma ċaħadx, qal biss li ma jixtieqx jidħol f’dawn il-kwistjonijiet.
Delia jżid id-distakk, jitlef is-siġġu u jrid li jibqa’
Il-Ħadd li għadda l-istorja kienet ħafna differenti. Il-Partit Nazzjonalista flok naqqas id-distakk kbir li bih il-Partit Laburista rebaħ l-elezzjoni ġenerali tal-2017, kompla jżidu biex issa jlaħħaq it-42,656 vot.
Mhux talli hekk, talli l-gwadann li kiseb il-Partit Nazzjonalista fl-2014, meta rebaħ it-tielet siġġu, spiċċa biex intilef ukoll.
Bħal fil-każ ta’ Simon Busuttil fl-2014, l-elezzjonijiet tal-ġimgħa li għaddew kienu wkoll l-ewwel test politiku għal Adrian Delia u r-riżultat li kiseb, kien ħafna aktar diżastruż minn dak ta’ Busuttil.
Kien għalhekk li d-Deputati li tkellmu mal-ILLUM insistew li Delia għandu jerfa’ r-responsabbilità, kif kien lest li jagħmel Busuttil, u jirriżenja.
Minkejja dan kollu, Adrian Delia għadu mhux qed iqis dan ir-riżultat bħala l-ewwel test politiku tiegħu u kontra kull kurrent li qed jgħidlu xorta oħra, qed jibqa’ jisħaq li t-tesserati tawh mandat biex iwassal lill-Partit Nazzjonalista sal-elezzjoni ġenerali.
Anke lil Puli jriduh barra...
L-iskuża li qed iġib il-Partit Nazzjonalista, b’mod partikolari s-Segretarju Parlamentari Clyde Puli, hija li l-Partit Nazzjonalista rnexxielu jnaqqas id-distakk li kienu qed juru s-sondaġġi sa ftit tax-xhur ilu, meta kienu qed jindikaw telfa għall-Partit Nazzjonalista ta’ madwar 70,000 vot.
Madanakollu, din l-iskuża mhix qed tinżel tajjeb ma’ bosta inkluż ma’ wieħed mid-Deputati li tkellmu magħna u li ddeskrivieha bħala “daħk fil-wiċċ.”
Intant, aktar kmieni din il-ġimgħa, is-sit illum.com.mt irrapporta wkoll kif, skont sorsi, għaddejjin manuvri fi ħdan il-Partit Nazzjonalista biex Puli ma jibqax Segretarju Ġenerali.
Min-naħa tiegħu, f’kummenti lill-istess sit, Puli insista li ħadd ma avviċinah biex iwarrab mill-kariga tiegħu, filwaqt li ddefenda l-ispjegazzjoni tiegħu dwar id-distakk bejn il-partiti fl-elezzjoni tal-Parlament Ewropew.
