Filmat | Emerġenza abbord il-bastiment Alan Kurdi ... mara tqila evakwata mill-Forzi Armati

Mara oħra kellha tiġi evakwata mill-Forzi Armati ta’ Malta minn fuq il-bastiment Alan Kurdi li ilu tmint ijiem bejn sema u ilma jistenna soluzzjoni politika biex jingħata port sigur.

Abbordi dan il-bastiment hemm 62 immigrant, fosthom tfal żgħar u 17-il membru tal-ekwipaġġ.

Jidher li kmieni matul il-lejl li għadda, mara tqila kellha attakk ta’ epilessjia u għalhekk l-ekwipaġġ talbu l-għajnuna tal-awtoritajiet Maltin.

Fi stqarrja, l-NGO Sea-Eye, saħqet l-awtoritajiet Maltin wieġbu mill-ewwel għal din is-sejħa u kif għamlu jumejn ilu, ħarġu wkoll għal din il-mara f’qasir żmien.

Madanakollu, tkompli l-istqarrija, is-sitwazzjoni abbord dan il-bastiment mistennija tmur għall-agħar fil-jiem li ġejjin.

“Dawn il-persuni il-ħin kollu qed jiġu jistaqsuna kemm se jdumu abbord il-vapur u għalfejn dan id-dewmien. Ħafna qed jibżgħu mill-maltemp. Ħafna minnhom il-baħar qed jagħmlilhom id-deni,” saħqet l-NGO waqt li fakkret li dan il-persuni diġà għaddew minn ħafna tbatija biex waslu sa hawn.

Day 8 - 🚨 a woman was evacuated for the second time. Osumah (23) is pregnant and had an epileptic seizure. Her husband stays worried with us on the #AlanKurdi. He was not allowed to accompany her.#saveLives pic.twitter.com/NxVBbYZb01

— sea-eye (@seaeyeorg) April 10, 2019