Politika Kronaka Soċjali Intervisti Zekzik Poodle Għawdex Qrati u Pulizija Kummerċjali

Coleiro Preca: Ma jidhirx li se jkollha l-konvenzjoni Kostituzzjonali taħt idejha

Jekk Muscat iżomm mal-istess data ta’ ħames snin ilu, suppost din il-ġimgħa jħabbar il-President il-ġdid

Albert Gauci Cunningham / 4 ta' Marzu 2019 17:23
Minn informazzjoni li għandha l-gazzetta ILLUM minn sorsi viċin ħafna tal-Gvern, jidher illi l-President Marie Louise Coleiro Preca mhix se tkun qed tmexxi l-Konvenzjoni Kostituzzjonali. Apparti minn hekk, minkejja xnigħat persistenti fost Deputati tal-Gvern stess li Coleiro Preca tixtieq tibqa’ responsabbli tal-Malta Community Chest Fund, l-istess sorsi qalu li dan mhux se jseħħ.

Kienet Coleiro Preca nnifisha illi f’intervista mal-gazzetta Maltatoday f’Jannar sostniet illi kienet f’diskussjonijiet mal-Prim Ministru biex hi tibqa’ tmexxi l-Konvenzjoni Kostituzzjonali, xi ħaġa li ġabet kritika qawwija mill-eks Deputat Nazzjonalista Franco Debono.

Matul l-aħħar jiem, il-gazzetta ILLUM għamlet kuntatt ma’ xi Deputati Laburisti li lkoll qalu li semgħu illi Coleiro Preca tixtieq li tibqa’ tmexxi l-Malta Community Chest Fund. Iżda, kelliem għall-President dan ċaħad din l-informazzjoni meta mistoqsi minn din il-gazzetta.

Sors viċin il-Gvern ċaħad ukoll li Coleiro Preca se tkun qed tieħu ħsieb l-MCCF u kkonferma li kollox juri illi Coleiro Preca lanqas mhi se tingħata t-tmexxija tal-Konvenzjoni Kostituzzjonali. Mhux ċar għalfejn hu dan, però sors partikolari qal illi jekk il-President li jmiss se jkun George Vella dan se jkun irid li jżomm taħt idejh din il-Konvenzjoni li hija ta’ natura ferm importanti.

Il-Konvenzjoni Kostituzzjonali kellha titmexxa minn Franco Debono, iżda fl-aħħar xhur kien deċiż li titmexxa mill-President Coleiro Preca wara li, skont Debono, din kienet qed timbotta biex tieħu dan l-irwol.

Din l-informazzjoni tiġi hekk kif minkejja li t-terminu tal-President tar-Repubblika jispiċċa xahar ieħor għadu ma tħabbarx min se jkun il-President li jmiss.

S’issa l-aktar żewġ ismijiet li ssemmew kienu l-Ministru tal-Edukazzjoni Evarist Bartolo u l-eks Ministru tal-Affarijiet Barranin George Vella.

Jekk Muscat iżomm mal-istess data ta’ ħames snin ilu (4 ta’ Marzu) suppost din il-ġimgħa jħabbar b’mod uffiċjali min se jkun il-President tar-Repubblika li jmiss.

Albert Gauci Cunningham, 36 sena, ġie appuntat Editur tal-gazzetta Illum u tas-sit illum.com.mt f'Ġunju tal-2015. Gauci Cunningham kien ġurnalista mal-Union Print. Gauci Cunningham jispeċjalizza l-aktar fi stejjer analitiċi-politiċi u anke soċjali li l-gazzetta ILLUM issa saret iktar popolari għalihom, kif ukoll fi stejjer relatati ma' politika nazzjonali u internazzjonali. Gauci Cunningham irraporta minn diversi Istituzzjonijiet Ewropej. Għall-qalb Gauci Cunningham hemm kwistjonijiet soċjali, fosthom il-faqar, il-kirjiet u l-ġustizzja soċjali.
Stħarriġ
Segwina fuq Facebook