Politika Kronaka Soċjali Intervisti Zekzik Poodle Għawdex Qrati u Pulizija Kummerċjali

'Il-ħaddiema barranin qed jgħinu lill-pajjiż biex il-pensjonijiet jibqgħu sostenibbli'

Il-Ministru Scicluna qal li mingħajr ħaddiema barranin, il-Gvern ikollu jdur għal soluzzjonijiet oħra fosthom età ogħla tal-irtirar

Yendrick Cioffi / 15 ta' Frar 2019 16:36
Iż-żieda fil-popolazzjoni tgħin biex tassigura li l-pensjonijiet jibqgħu sostenibbli. Dan qalu l-Ministru għall-Finanzi Edward Scicluna meta mitlub jirreaġixxi għat-twissija tal-Prim Ministru lil dawk li huma kontra l-ħaddiema barranin.

Għall-mistoqsija tal-ġurnalist tal-MaltaToday, il-Ministru Scicluna qal li t-tnaqqis fil-popolazzjoni ma jgħinx biex il-pensjonijiet jinżammu sostenibbli.

Spjega kif meta għandek pajjiż bħal Malta, fejn il-popolazzjoni qed tixjieħ, il-pensjonijiet jistgħu jinżammu sostenibbli jekk togħla l-età tal-irtirar jew inkella jiżdied il-ħlas tal-bolla.

Kien għalhekk li qal li l-influss tal-barranin jagħti spinta ‘l quddiem lill-popolazzjoni tal-ħaddiema u dan ifisser li l-Gvern ikun jista’ jżomm pensjonijiet sostenibbli mingħajr ma jdur għal soluzzjonijiet oħra.

“Mhux qed ngħid li mingħajr ħaddiema barranin mhux se jkollna pensjonijiet, iżda li jkollna nindirizzaw il-kwistjoni dwar is-sostenibbilità tal-pensjonijiet b’metodi oħra,” qal Scicluna.

Il-kummenti li kien għadda l-Prim Ministru kienu kkritikati mill-Oppożizzjoni li qed tisħaq li l-uniku pjan tal-Gvern għat-tkabbir ekonomiku hija ż-żieda fil-popolazzjoni.

Stħarriġ
Segwina fuq Facebook