Politika Kronaka Soċjali Intervisti Zekzik Poodle Għawdex Qrati u Pulizija Kummerċjali

Il-Gvern jilqa' b'sodisfazzjon il-credit rating ta' Fitch ta' 'A+ stable'

Dawn l-esperti internazzjonali qed ibassru li, fis-sentejn li ġejjin, il-Gvern Malti ser jibqa’ jirreġistra surplus ta’ qrib il-1% tal-ġid nazzjonali. 

Albert Gauci Cunningham / 2 ta' Frar 2019 11:31
Il-Gvern sodisfatt bir-rating ta' Fitch
L-aġenzija internazzjonali Fitch Ratings ikkonfermat il-credit rating ta’ Malta bhala A+ ‘stable’. Fir-rapport tagħhom, l-esperti ta’ Fitch Ratings jgħidu li l-andament tal-finanzi ta’ pajjiżna kien aħjar minn dak f’pajjiżi bl-istess rating.  

Dawn l-esperti internazzjonali qed ibassru li, fis-sentejn li ġejjin, il-Gvern Malti ser jibqa’ jirreġistra surplus ta’ qrib il-1% tal-ġid nazzjonali.

Il-Gvern fi stqarrija fakkar illi dan ser jinkiseb mingħajr dipendenza fuq id-dħul mill-programm ta’ ċittadinanza b’investiment. 

Minkejja ż-żieda antiċipata fuq proġetti kapitali, Fitch Ratings tgħid li sa għaxar snin oħra, il-piż tad-dejn nazzjonali ser ikun naqas għal inqas minn 27%, iġifieri ferm aktar minn nofs il-piż li kien hemm fl-2012.

Minkejja l-prospetti xejn sbieħ fl-ekonomiji ta’ madwarna, l-ekonomisti ta’ Fitch Ratings qed ibassru tkabbir ekonomiku f’Malta ta’ aktar minn 5% għal din is-sena. 

Il-Gvern temm jgħid li din l-analiżi pożittiva ta’ Fitch Ratings tikkonferma l-fiduċja li teżisti f’pajjiżna. "Dan is-suċċess qed iwassal għal aktar interess f’Malta minn investituri barranin, u b’hekk, għal ekonomija aktar b’saħħitha għall-ġid tal-familji u n-negozji ta’ pajjiżna."

Albert Gauci Cunningham, 36 sena, ġie appuntat Editur tal-gazzetta Illum u tas-sit illum.com.mt f'Ġunju tal-2015. Gauci Cunningham kien ġurnalista mal-Union Print. Gauci Cunningham jispeċjalizza l-aktar fi stejjer analitiċi-politiċi u anke soċjali li l-gazzetta ILLUM issa saret iktar popolari għalihom, kif ukoll fi stejjer relatati ma' politika nazzjonali u internazzjonali. Gauci Cunningham irraporta minn diversi Istituzzjonijiet Ewropej. Għall-qalb Gauci Cunningham hemm kwistjonijiet soċjali, fosthom il-faqar, il-kirjiet u l-ġustizzja soċjali.
Stħarriġ
Segwina fuq Facebook