Il-General Manager tal-Malta Public Transport (MPT) Konrad Pulè sostna ma’ din il-gazzetta illi minkejja li l-idea li t-trasport pubbliku b’xejn għal kulħadd hija proposta tajba, din ma tistax isseħħ fl-istat preżenti tat-trasport pubbliku.
Kien il-Prim Ministru Joseph Muscat illi żewġ Ħdud ilu sostna li l-viżjoni tal-Gvern hija li t-trapsort pubbliku jkun b’xejn għal kulħadd.
Din il-gazzetta, nhar il-Ħadd li għadda, ippubblikat analiżi ta’ x’ġara fejn din l-inizjattiva saret, anke fejn din saret għal settur tal-popolazzjoni biss, kif fil-fatt diġà qed iseħħ f’Malta. Ir-riżultati kienu inkoraġġanti f’postijiet bħall-Istati Uniti, Brussell u Chateauroux (Franza) b’żidiet ta’ bejn 70% u 200% fl-ammont ta’ passiġġieri u diżappuntanti f’postijiet oħrajn bħal Hesselt (il-Belġju) fejn wara 16-il sena reġgħet iddaħħlet is-sistema ta’ nollijiet minħabba li t-trasport b’xejn ma baqax sostenibbli.
Din il-gazzetta għamlet kuntatt ma’ Pulè, li sostna illi huwa fatt illi inizjattiva bħal dik li ħabbar il-Prim Ministru hija pożittiva fis-sens li għandha potenzjal li tattitra mijiet jekk mhux eluf ta’ passiġġieri ġodda. “Imma biex taħdem din l-inizjattiva jeħtieġ ikun hemm l-ispazju. Ċerti rotot,” kompla jinsisti l-General Manager tal-MPT, “diġà bilkemm qed ilaħħqu bħalissa aħseb u ara kemm se jlaħħqu għal dawk iż-żidiet li ġġib magħha miżura bħal din.” Fil-fatt, kif qal Pulè, ċertu rotot, speċjalment dawk li jgħaddu minn Tas-Sliema, San Ġiljan u jispiċċaw Paceville, dawk li jgħaddu jew jibdew mill-Qawra/San Pawl il-Baħar kif ukoll dawk li jibdew miċ-Ċirkewwa u jgħaddu mill-Mellieħa għall-Belt/ Tas-Sliema, ikunu qed joperaw b’vetturi imballati bin-nies. Dan jinħass speċjalment fix-xhur illi fihom ikun hawn ħafna turisti (peak season), liema perjodu kompla jiżdied fl-aħħar snin bil-miġja ta’ aktar turisti fix-xhur tar-rebbiegħa u l-ħarifa.
Pulè fakkar illi apparti żieda fil-vjaġġi, li tista’ tfisser il-bżonn ta’ żieda fir-riżorsa, trasport mingħajr ħlas jista’ jfisser illi tiżdied id-domanda f’żoni fejn għalissa m’hemmx domanda, li tfisser ukoll allura illi l-kumpanija jkollha tibda rotot ġodda, jew tbiddel dawk eżistenti jew saħansitra testendi rotta partikolari għal aktar sigħat. “Kif inhi s-sistema tat-trasport pubbliku bir-rotot u d-domanda kif inhi llum din il-proposta mhix possibbli li tkun attwata,” insista Pulè, li kompla jiċċara illi biex issir irid ikun hemm bidliet fis-sistema. “Kif kien hemm fl-analiżi tagħkom stess, din il-miżura tista’ taħdem, imma mhux waħedha. Irid ikun hemm miżuri oħrajn.”
Mistoqsi x’tip ta’ miżuri qed jirreferi għalihom, Pulè elenka lista qasira ta’ miżuri. “L-ewwel nett irid ikun hemm iktar spazju fejn indaħħlu aktar passiġġieri. Iktar spazju jfisser, iktar passiġġieri. Imma hemm ukoll il-bus lanes, għandna bżonn inżidu l-karreġġjati għal tal-linja,” sostna Pulè li rrikonoxxa illi ħafna sewwieqa ma tantx huma ħerqana dwar il-karreġġjati għal tal-linja. Żied jgħid imma li din hija waħda mill-miżuri importanti li trid tiġi attwati jekk irridu li jiżdied l-użu tat-trasport pubbliku.
Pulè, kif kien fil-fatt diġà sostna f’intervista ma’ din il-gazzetta lura f’Jannar tas-sena l-oħra, qal illi hemm bżonn ta’ infurzar serju fejn jidħol parkeġġ fuq il-bus stops. Huwa fakkar illi meta vettura oħra tkun ipparkjata f’bus stop dan joħloq problemi għal tal-linja li tipprova tidħol fl-ispazju. Ġeneralment dan ikun ifisser li tal-linja tostakola t-triq u jinħoloq it-traffiku.
