Il-Kunsill Amministrattiv ħareġ bid-deċiżjoni tiegħu u qed iħeġġeġ lil Adrian Delia biex jikkunsidra l-pożizzjoni tiegħu bħala kandidat għall-kariga tal-PN, fi ftit kliem qed jitolbu jikkunsidra li jirtira. Din it-talba qed issir 48 siegħa biss qabel mal-Kunsillieri jibdew jivvutaw.
Minkejja dan, l-istess Kunsill ma sab xejn ħażin fil-kandidaturi ta' Frank Portelli, Alex Perici Calascione jew Chris Said.
Fl-istqarrija l-Kunsill sostna li jinnota li, “filwaqt li japprezza l-limitazzjonijiet, inkluż ta’ kunfidenzjalità professjonali li jista’ għandu Dr Delia bħala avukat, il-Kumitat iqis li hemm aspetti oħra pendenti li għadhom m’humiex verifikati, u li Dr Delia baqa’ ma spjegax, kemm dwar il-kont f’Barclays International Jersey Bank allegatament f’isem Dr Delia, l-iskop u l-użu ta’ dan il-kont u l-legalita’ tal-provenjenza ta’ dawn il-fondi.”
Il-Kumitat ta’ Etika irriżultalu wkoll li “fl-1 ta’ Lujlu 2003 il-Pulizija Ingliża għamlet raid fuq proprjetà ta’ Healey Properties li kienet mikrija lil terzi, f’liema kumpanija Dr Delia kien Direttur kif kien ukoll Dr Chris Cardona. Mir-raid irriżulta li l-post kien qed jintuża minn terzi għal skopijiet ta’ prostituzzjoni. Dr Delia u Dr Chris Cardona irriżenjaw minn Diretturi ta’ din il-kumpanija f’Diċembru tal-istess sena.”
Kieku kont minflok Adrian Delia, jien kont nirtira
Simon Busuttil, Kap uxxenti
Fid-dawl ta' din l-istqarrija l-Kunsill Amministrattiv qal li "jkun xieraq li Adrian Delia, minn jeddu, jirrikkunsidra l-pożizzjoni tiegħu bħala kandidat għal din l-elezzjoni."
Fl-ewwel kummenti tiegħu Delia qal li l-establishment tal-partit qed jipprova jħammeġ ismu u jinfluwenza. "Nhar is-Sibt nitlob lill-Kunsillieri biex jivvutaw għall-bidla, ħalli l-partit jsir tal-ħafna, ma jibqax tal-ftit." Delia qal li se jmur għall-elezzjoni għax il-Kumitat tal-Etika ma sab xejn kontrieh, tant li lanqas seta' mqar joħroġ imqar sanzjoni kontrieh. "Ma sabu xejn ħażin u ħadd, qatt mhu se jsib xejn ħażin," sostna Delia li qal ukoll illi lilu l-Ammistrattiv qatt ma tkellmu miegħu.
Delia qal li ltaqa' ma' Simon Busuttil ilejla stess u talbu jurih oġġett jew punt wieħed li m'għamlux idoneu għll-kap tal-PN, "u Simon Busuttil ma weġibnix."
Intant il-Kap tal-PN f'kummenti lill-ġurnalisti li kienu mxandra diretti fuq l-istazzjon tal-Partit Laburista, ONE, qal li kieku kien hu, iffaċċjat bir-rapport kien jiritra.
