Il-funeral organizzat mill-Istat tal-Professur Oliver Friggieri se jsir għada l-Erbgħa.
Il-quddiesa praesente cadavere se ssir fil-Konkatidral ta’ San Ġwann fil-Belt Valletta fis-2.00p.m u se tkun ikkonċelebrata mill-Arċisqof Charles Scicluna.
Kif tħabbar il-funeral ta' Friggieri qed jiġi organizzat mill-Istat Malti b’rikonoxximent għall-kontribut straordinarju li ta lil pajjiżna u lil niesu tul il-karriera tiegħu.
Il-Gvern iddeċieda wkoll li għada l-Erbgħa jiġi mmarkat bħala jum ta’ luttu. Is-Segretarju Permanenti Ewlieni Mario Cutajar kiteb uffiċjalment lis-Segretarji Permanenti, Diretturi Ġenerali, Diretturi u Kapijiet tal-Entitajiet Pubbliċi biex għada l-bnadar fuq il-binjiet pubbliċi jittajru mezz’asta.
Il-Korteo funebri se jitlaq mill-Isptar Mater Dei fis-12.45p.m lejn l-Università ta’ Malta fejn il-Professur Friggieri għadda għexieren ta’ snin minn ħajtu jeduka lill-istudenti tiegħu bħala lettur fid-Dipartiment tal-Malti fejn serva wkoll bħala Kap tad-Dipartiment u Professur tal-Letteratura.
Minn hemmhekk il-Korteo funebri jipproċedi għal quddiem ir-residenza privata tiegħu fi Fleur-de-Lys, u għal quddiem il-Knisja Arċipretali ta’ San Publiju fil-Furjana, raħal twelid Friggieri fejn se tingħatalu tislima mill-Kunsill Lokali tal-Floriana u mill-Kleru tal-Parroċċa ta’ San Publiju. Wara l-Korteo funebri jipproċedi lejn il-Konkatidral ta’ San Ġwann.
Fi tmiem il-quddiesa, il-funeral ikompli f’forma strettament privata.
Il-pubbliku huwa mgħarraf li minħabba restrizzjonijiet marbuta mal-pandemija, fil-Konkatidral ta’ San Ġwann se jitħallew jidħlu biss dawk li se jirċievu l-istedina uffiċjali.
Il-quddiesa praesente cadavre se tixxandar fuq l-istazzjon nazzjonali TVM u fuq maltagov, il-paġna uffiċjali tal-Gvern fuq Facebook.
Friggieri, li kellu 73 sena, miet nhar is-Sibt li għadda.
Huwa jibqa' mfakkar bħala ġgant tal-letteratura u ħabib tal-Ilsien Malti.
Fost ir-Rumanzi l-aktar magħrufa tiegħu, jibqgħu 'It-Tfal jiġi bil-Vapuri' u 'Fil-Parlament ma jikbrux Fjuri.'
Ix-xogħlijiet tiegħu ġew tradotti f’bosta lingwi f’pajjiżi barranin u għamlu isem lil Malta madwar id-dinja.
Friggieri huma maħbub minn bosta, partikolarment eks studenti tiegħu. Huma jiddeskrivu l-lezzjonijiet tiegħu kienu lezzjonijiet dwar il-ħajja.
Ilbieraħ, Manwel Mifsud, f'isem l-Akkademja tal-Malti, bgħatilna din il-poeżija li permezz tagħha sellem lill-Professur:
OLIVER
Magħruf imma ma jħobbx jidher,
maħbub imma ma jħobbx jitfissed,
internazzjonali imma baqa’ Malti.
Għex bħal tifel kurjuż, jitħasseb, jissaħħar quddiem il-misteri kbar li jdawruna,
ħabb bis-sħiħ il-valuri l-qodma li jsaħħuna,
kittieb ta’ veru, ittratta t-temi li tassew jaħarqu, dawk li dejjem se jibqgħu jolqtuna.
F’kitbietu qaxxar ir-ruħ tal-poplu Malti, il-ġlieda tiegħu biex jinbidel bla ma jitlef rasu, ruħu, ilsienu.
Kien inkwetat fuq il-futur tal-kultura u tal-lingwa Maltija...
Forsi t-testment tiegħu hu l-muftieħ għal dak li ilna ħafna nfittxu u nixtiequ,
il-bilanċ bejn il-Jien u Lil hinn minnu.
Bħal Ninu Cremona, Dun Karm u Ġużè Aquilina, kompla jikxef is-setgħat tal-Ilsien Malti,
kompla jsaħħilna l-aqwa mezz għall-identità tagħna.
Ta’ dan kollu, u ta’ tant ġid ieħor li forsi lanqas intbaħna bih,
Oliver
nirringrazzjawk.
Ħabibek Manwel
