‘B’€400 paga inqas kif se naħdem karru? Il-Karnival għandu jitħassar minn issa’

Il-Karnival fadallu sa Frar iżda diversi dilettanti tal-Karnival ikunu bdew jaħsbu jekk mhux diġà jkunu bdew jiltaqgħu fl-imħażen, biex iħejju l-karru u anke jibdew jaħsbu għaż-żfin u l-kostumi. Madanakollu, din is-sena, minħabba l-imxija tal-Covid-19, hemm inċertezza kbira u diversi dilettanti li tkellmu mal-gazzetta ILLUM saħqu li għalihom se jkun kważi kważi impossibbli li jtellgħu l-kumpanija u minkejja li l-Karnival huwa ħajjithom, huma stess insistew li għandu jitħassar minnufih.

Fil-fatt, il-gazzetta ILLUM tinsab infurmata li kien hemm kumpanija li diġà infurmaw liż-żeffiena tagħhom li s-sena d-dieħla mhux se jkunu qed jieħdu sehem. 

‘Il-Karnival għandu jkun pospost minn issa ... jekk le se jsalbuna’

Wieħed mill-parteċipant, li ma xtaqx li nxandru ismu u li għandu kumpanija tal-Karnival, insista li ma jistax jifhem kif il-kumitat organizzativ se jistenna sa Ottubru (ara aktar ‘il quddiem) biex jiddeċiedi dwar jekk il-Karnival hux se jsir jew le. Fi kliemu, anke jekk il-każi jonqsu u l-pandemija tisparixxi, ħafna mid-dilettanti ma jifilħux jidħlu għall-ispejjeż

“Jekk il-Karnival mhux se jkun pospost se jsalbuna. Iż-żeffiena ma jridux jinżlu għaż-żfin għax qed jibżgħu, sponsors mhux se nsibu u hemm minn spiċċa bla xogħol. Għidli inti jekk leader spiċċa bla xogħol kif se jiflaħ jonfoq €15,000 fuq karru,” spjega magħna dan id-dilettant.

Fakkar li anke l-fatt li fl-attivitajiet organizzati ma jistax ikun hemm gruppi ta’ aktar minn għaxar persuni miġbura fi grupp wieħed, se jkun qed jagħmel il-Karnival impossibbli li jsir, dejjem jekk ir-restrizzjonijiet jibqgħu dawk li huma.

“Kieku mix-xahar id-dieħel irridu nibdew nippreparaw għaż-żifna. Kif se niġbru 40 persuna ġo sala waħda,” insista magħna. “U x’jiġri jekk tagħmel xhur taħdem u ħmistax qabel il-Karnival ikun hemm xi membru tal-kumpanija tiegħek li jirriżulta pożittiv għall-virus? Se niġu skwalifikati u narmu l-ħidma kollha?”

Propju għalhekk li dan l-istess leader insista li fl-opinjoni tiegħu l-Karnival għandu jkun pospost minn issa u ma jaraw għaliex id-deċiżjoni għandha tittieħed f’Ottubru. 

“Żeffiena qed iħassru għax qed jibżgħu. Hemm min spiċċa bla xogħol? Kif se jħallas għall-kostum? Hemm leaders li jaħdmu għal rashom u li xogħolhom ġie affettwat. Kif se joħorġu dawk il-flejjes kollha? Anke jekk il-każi jonqsu, se jkun hemm min mhux se jkun jiflaħ,” temm jisħaq.

‘Sa Novembru nkun diġà ħriġt €10,000 ...’

Parteċipant ieħor li l-gazzetta ILLUM tkellmet miegħu, ukoll insista li l-Karnival għandu jitħassar minn issa u meta mistoqsi għaliex ma jaqbadx u ma jiħux sehem hu, insista magħna li ma jaqbillux jagħmel dan, għax inkella jispiċċaw iwaqqgħuh sezzjoni.

“Jiena spiċċajt b’€450 inqas paga. L-ispejjeż qed inħosshom doppji. Diġà nfaqt €300 ħadid. Biex tixtri mutur illum malajr trid €500. Għandi tnejn irrid nirranġahom. Għandi mal-€200 il-wieħed,” insista magħna dan il-parteċipant. “La qalulna nkomplu, ma nistax ma nagħmel xejn. Fis-sezzjoni tiegħi hemm il-kompetizzjoni.”

Saħaq ukoll kif ħafna mill-voluntiera huma żgħażagħ ta’ madwar l-14-il sena u l-ġenituri tagħhom, bir-raġun, mhux qed iħalluhom jinżlu l-maħżen. 

“Kif se naħdmu karru b’erba’ min-nies biss,” kompla jisħaq. “Kif inhi s-sitwazzjoni ma tistax tlaqqa’ ħafna nies. Fil-maħżen, meta l-ħidma tikkarga, ġieli nkunu 20. Anke għaż-żifna, hawn min jiġi bit-tfal ukoll.”

Kien għalhekk li insista li jekk għandha tittieħed deċiżjoni, din għandha ttieħed issa u mhux f’Ottubru. “Sa Novembru jien inkun diġà nfaqt €10,000,” insista.

Temm jisħaq li l-Kumitat għandu żewġ għażliet. Jew li jħassar kollox jew almenu jiddeċiedi li s-sena d-dieħla l-Karnival isir fuq skala iżgħar u mingħajr kompetizzjoni, għax hekk l-ispejjeż, bla ma trid, se jonqsu għal kulħadd.

‘Għalissa business-as-usual ... deċiżjoni f’Ottubru’ – Jason Busuttil

Dwar dan kollu, il-gazzetta ILLUM tkellmet mad-Direttur Artistiku tal-Karnival ta’ Malta, Jason Busuttil li spjega kif għaddejin diskussjonijiet kontinwi mal-għaqda li tirrappreżenta lill-parteċipanti.

Mistoqsi dwar it-tħassib li diversi dilettanti tal-Karnival urew mal-gazzetta ILLUM, anke għax kieku dalwaqt iridu jibdew jaħdmu, Busuttil insista li hemm qbil li f’nofs Ottubru se tkun qed tittieħed deċiżjoni finali dwar jekk il-Karnival għas-sena d-dieħla hux se jsir jew le.

“Sadanittant aħna ma nistgħux nibqgħu idejna fuq żaqqna u se nkomplu bil-preparamenti kollha neċessarji,” insista Busuttil. “Għalissa kollox business-as-usual. Mhux aħna biss ħriġna l-poster tal-Karnival 2021. Karnivali oħra madwar id-dinja, fosthom Reggio Calabria fl-Italja, ukoll għaddejin bil-preparamenti tagħhom u hemm min ukoll ippubblika l-poster tiegħu.”  

Madanakollu, Busuttil irrikonoxxa li jekk ir-restrizzjonijiet jibqgħu dawk li huma, fosthom anke li persuni ma jistgħux jitlaqqgħu fi gruppi kbar, se jkun impossibbli li l-Karnival isir, waqt li fakkar li kumpanija taż-żfin ikollha xejn inqas minn 40 parteċipant miġbura flimkien.

“Se nieħdu kollox inkonsiderazzjoni. Kemm ir-restrizzjonijiet u anke s-sitwazzjoni personali tal-parteċipanti. Qed naħdmu id f’id magħhom u f’Ottubru se niddeċiedu,” Busuttil.

Mistoqsi dwar kumpaniji li ddeċidew li s-sena d-dieħla ma jiħdux sehem, Busuttil saħaq li għandux din l-informazzjoni. Anzi insista li kollox jindika li jekk il-Karnival isir se jkun hemm numru rekord ta’ parteċipanti.