47 persuna salvati minn bastiment tas-salvataġġ Spanjol ftit 'il bogħod minn Malta

Dgħajsa li fuqha kellha abbord 47 persuna kienet lokalizzata minn bastiment tas-salvataġġ Spanjol, liema dgħajsa tinsab fiż-żona ta’ Tiftix u Salvataġġ ta’ Malta.

Il-bastiment, Aita Mari, operat mill-NG0 SMH, kienet fi triqitha minn Spanja għal Sirakuża meta daret biex issalva lill-immigranti.

Skont l-NGO Alarm Phone, il-bastiment ma għandux biżżejjed tagħmir mediku biex iżomm l-immigranti abbord u qed jitlob għall-għajnuna.

Dan l-iżvilupp seħħ wara li Alarm Phone ppubblikat recording ta’ talba għall-għajnuna li saret minn mara tqila abbord id-dgħajsa.

Ma’ din il-mara, hemm ukoll tifla ta’ seba’ snin. L-omm qalet li bintha ma tiflaħx u ma għandhomx ikel u xorb.

Din hija waħda minn żewġ dgħajjes li jinsabu bejn sema u ilma wara li kemm Malta u anke l-Italja għalqu l-portijiet tagħhom fid-dawl tal-pandemija tal-Covid-19.

Il-ġimgħa li għaddiet, Malta salvat 60 immigrant iżda informat lill-Kummissjoni Ewropea li l-portijiet tagħha se jingħalqu.

Aqra aktar fuq:

• Il-Ministru jiċħad li nqalbet dgħajsa viċin Malta u mietu l-immigranti kollha li kienu abbord