Operatur liċenzjat tal-logħob tan-nar ġie lliberat minn akkużi marbuta ma’ spettaklu li sar fil-Belt Valletta fl-2023, wara li l-Qorti sabet li l-prosekuzzjoni ma ppruvatx il-ksur allegat.
Bernard David Cauchi kien akkużat li naqas milli jnaddaf iż-żona wara wirja ta’ logħob tan-nar u li, bħala detentur tal-liċenzja rilevanti, ma żgurax li kienu qed jiġu osservati r-restrizzjonijiet jew il-kundizzjonijiet marbuta magħha.
Fit-30 ta’ Settembru, il-Qorti lliberatu miż-żewġ akkużi.
Il-każ kien imur lura għall-10 ta’ Ġunju 2023, meta Reuben Grima għamel ilment dwar logħob tan-nar li kien tpoġġa qrib il-monument tas-Siege Bell, viċin il-Bocci Club tal-Belt, għall-ħabta tat-8:40pm.
Il-wirja kienet marbuta ma’ tieġ li kien qed isir fil-Mediterranean Conference Centre.
Grima qal li l-logħob tan-nar kien tqiegħed f’ġnien pubbliku qrib playground tat-tfal u sostna li ma kienx hemm sinjali ta’ twissija jew miżuri ta’ sigurtà viżibbli.
Skont ix-xhieda tiegħu, raġel fuq il-post kien qallu li l-logħob tan-nar kien se jinħaraq fid-9pm u allegatament kien ħa responsabbiltà kemm għal dak is-sett kif ukoll għal tnejn oħra.
Cauchi, min-naħa tiegħu, qal li kellu Liċenzja A u permess tal-Pulizija li kien jawtorizzah ipoġġi l-logħob tan-nar.
Huwa qal ukoll li l-logħob tan-nar tqiegħed madwar nofs siegħa qabel kellu jinħaraq u li kien hemm persuna oħra liċenzjata fuq il-post biex tissorveljah.
Cauchi sostna wkoll li n-nies kienu ġew mwissija biex jitbiegħdu miż-żona qabel l-ignition u li l-post tnaddaf wara li nħaraq il-logħob tan-nar.
Dwar l-ewwel akkuża, dik li allegatament naqas milli jnaddaf wara l-wirja, il-Qorti qalet li ma kien hemm l-ebda prova li Cauchi ħalla skart jew fdalijiet tal-logħob tan-nar fuq il-post.
Il-Qorti nnotat li l-ilment ta’ Grima kien dwar dak li ra qabel il-wirja, u mhux dwar xi trab jew logħob tan-nar li baqa’ fuq il-post wara.
Anke l-uffiċjal investigatur ma kellux prova li nstabu fdalijiet jew skart wara l-wirja.
Fir-rigward tat-tieni akkuża, il-Qorti sabet ukoll li ma ġiex ippruvat biżżejjed li Cauchi kiser xi obbligu marbut mal-liċenzja tiegħu.
Il-Qorti qablet mal-argument tad-difiża li l-prosekuzzjoni ma indikatx b’mod ċar liema kundizzjoni speċifika tal-liċenzja allegatament inkisret.
Minflok, mill-provi rriżulta li Cauchi kien regolarment liċenzjat, kellu l-assigurazzjoni meħtieġa u kellu permess, jew għallinqas ma kien hemm l-ebda oġġezzjoni, mill-Valletta St Paul’s Bocci Club biex juża l-pitch għall-wirja.
Il-Qorti nnotat ukoll li l-post użat kien jaqbel ma’ dak indikat fuq is-site plan.
Fattur ieħor li dgħajjef il-każ tal-prosekuzzjoni kien li Grima ma setax jidentifika lil Cauchi bħala r-raġel li kien kellem dakinhar tal-inċident.
Il-Maġistrat Nadine Sant Lia ddeskriviet dan in-nuqqas bħala “daqqa fatali” għall-każ tal-prosekuzzjoni.
Cauchi għalhekk instab mhux ħati miż-żewġ akkużi u ġie lliberat minn kull responsabbiltà kriminali.
L-avukat Matthew Xuereb rrapreżenta lill-Bernard David Cauchi.
