Raġel ta’ 34 sena minn Bormla tilef ħajtu l-Ġimgħa filgħodu wara li kien involut f’ħabta ma’ trakk waqt li kien qed isuq il-mutur tiegħu fil-Gudja, qalet il-Pulizija.
L-inċident seħħ għall-ħabta tad-9.45am fi Triq Ħal Far, it-triq li tgħaddi maġenb ir-runway tal-ajruport.
Mill-ewwel investigazzjonijiet tal-Pulizija rriżulta li trakk Leyland Cruiser, misjuq minn raġel ta’ 63 sena, kien involut f’ħabta mal-mutur Yamaha tal-vittma.
Tim mediku mar immedjatament fuq il-post biex jagħti l-għajnuna lir-raġel, iżda huwa kien ċċertifikat mejjet fuq il-post.
Il-Pulizija ma tat l-ebda informazzjoni immedjata dwar il-kundizzjoni tas-sewwieq tat-trakk.
L-investigazzjonijiet tal-Pulizija għadhom għaddejjin.
Il-Maġistrat Monica Borg Galea qed tmexxi inkjesta dwar il-każ.
.png)
