Raġel iweġġa’ serjament wara li tilef il-kontroll tal-karozza u spiċċa f’għalqa fil-Wardija

Raġel ta’ 54 sena weġġa’ serjament wara li tilef il-kontroll tal-karozza li kien qed isuq u spiċċa f’għalqa fil-Wardija kmieni s-Sibt filgħodu.

Il-pulizija qalet li ġiet infurmata għall-ħabta tas-6:30am li kienet meħtieġa l-assistenza fi Triq San Ġwann tal-Ħerba.

Mill-ewwel stħarriġ irriżulta li r-raġel kien qed isuq Toyota iQ meta għal xi raġuni tilef il-kontroll tal-vettura u spiċċa f’għalqa.

Fuq il-post issejjaħ tim mediku biex jassistih, qabel ittieħed b’ambulanza lejn l-Isptar Mater Dei.

Aktar tard huwa ġie ċċertifikat li ġarrab ġrieħi serji.

L-investigazzjonijiet tal-pulizija dwar l-inċident għadhom għaddejjin.