Il-Pulizija sekwestrat 85 par nuċċali tax-xemx foloz b’ditti fosthom Ray-Ban, Gucci u Versace, kif ukoll bagalja
Raġel ta’ 61 sena li nqabad ibigħ prodotti tad-ditta foloz f’Golden Bay ingħata sentenza ta’ sena ħabs sospiża għal erba’ snin wara li ammetta l-akkużi miġjuba kontrih.
Ir-raġel, ta’ nazzjonalità Senegaliża, tressaq il-Qorti u wieġeb ħati għal akkużi relatati mal-bejgħ u ż-żamma ta’ prodotti foloz, kif ukoll talli wettaq attività kummerċjali mingħajr il-liċenzja meħtieġa.
Il-Qorti semgħet kif fl-20 ta’ Awwissu, il-Pulizija rċeviet telefonata li fiha ġiet infurmata li Balla Diop, li huwa mis-Senegal iżda jgħix l-Imsida, kien qed ibigħ prodotti suspettati li kienu foloz f’Golden Bay.
Il-Pulizija sussegwentement sabet diversi oġġetti, fosthom 85 par nuċċali tax-xemx u bagalja, flimkien ma’ prodotti oħra.
Fost l-oġġetti kien hemm 85 par nuċċali tax-xemx li kellhom marki foloz ta’ ditti magħrufa fosthom Ray-Ban, Gucci u Versace.
Ir-raġel ġie akkużat li ffalsifika jew biddel trademarks, jew li xjentement għamel użu minn marki ffalsifikati jew mibdula mingħajr il-kunsens tas-sid.
Huwa ġie akkużat ukoll li xjentement għamel użu minn marka, sinjal jew emblema li setgħu jqarrqu bix-xerrej dwar ix-xorta tal-merkanzija, kif ukoll li xjentement qiegħed fiċ-ċirkolazzjoni, biegħ, żamm għandu għall-bejgħ jew importa għal skopijiet kummerċjali merkanzija b’marki li jixxiebhu b’qerq ma’ dawk oriġinali.
Ir-raba’ akkuża kienet relatata mat-twettiq ta’ attività kummerċjali mingħajr liċenzja mill-awtorità kompetenti.
L-akkużat wieġeb ħati għall-akkużi kollha miġjuba kontrih.
Wara li ġiet irreġistrata l-ammissjoni tiegħu, il-Qorti tatu ċ-ċans biex jerġa’ jikkunsidra l-ammissjoni. Huwa kkonferma li xtaq jibqa’ jammetti għall-akkużi.
Il-Qorti kkundannat lir-raġel għal sena ħabs sospiża għal erba’ snin.
L-akkużat kien assistit minn avukat tal-għajnuna legali.
L-Ispettur Bradley Grima mexxa l-prosekuzzjoni.
Il-Maġistrat Antoine Agius Bonnici ppresieda s-seduta
.png)
