Raġel ta’ 37 sena minn Bormla nżamm arrestat wara li wieġeb mhux ħati għal akkuża ta’ attentat ta’ qtil b’rabta ma’ allegat hit-and-run li seħħ nhar il-Ħadd li għadda.
L-inċident seħħ fid-9 ta’ Awwissu għall-ħabta tal-11:30am f’Bormla, meta l-Pulizija ġiet infurmata b’hit-and-run li ħalla raġel ferut.
Meta marru fuq il-post, il-pulizija sabu biċċiet minn vettura kif ukoll pjanċa tar-reġistrazzjoni. Wara li ttraċċaw il-pjanċa sas-sid tal-vettura, l-investigaturi ġew infurmati li l-karozza kienet qed tinstaq minn Johan Cassar.
Il-Pulizija sussegwentement sabet lill-akkużat fid-dar ta’ missieru, filwaqt li l-vettura nstabet fil-viċinanzi bi ħsarat estensivi.
Waqt l-investigazzjonijiet, il-Pulizija kisbet filmati minn kameras tas-sigurtà fil-qrib. Il-prosekuzzjoni allegat li l-filmati juru lil Cassar isuq il-vettura għal fuq il-bankina fid-direzzjoni tal-vittma, qabel ma rriversja biex jerġa’ jolqtu.
Cassar wieġeb mhux ħati għall-akkużi miġjuba kontrih. Ma saritx talba għall-ħelsien mill-arrest u għalhekk il-qorti ordnat li jinżamm arrestat.
Il-qorti ħarġet ukoll ordni ta’ protezzjoni favur il-vittma.
Fl-2018, Cassar kien tressaq il-Qorti fuq sensiela ta’ akkużi oħra, fosthom li rreżista l-arrest bi vjolenza, hedded sitt uffiċjali tal-Pulizija, beżaq lejn uffiċjal u kiser il-paċi pubblika.
