Multa amministrattiva on-the-spot ta’ €150 minħabba awrinar fil-pubbliku ġewwa Paceville spiċċat f’ħarba mill-pulizija u wasslet biex żewġ żgħażagħ Franċiżi jammettu sensiela ta’ akkużi quddiem il-qorti.
Shawn Dominati u Elyes Franck Bauchet, it-tnejn ta’ 19-il sena, dehru quddiem il-Maġistrat Gabriella Vella is-Sibt, fejn ammettew diversi akkużi marbuta ma’ konfront li seħħ tard billejl barra Sky Club f’San Ġiljan.
Dan huwa fost l-ewwel każijiet li waslu quddiem il-qrati wara li f’Ġunju li għadda ġew introdotti multi amministrattivi fuq il-post maħsuba biex jindirizzaw l-imġiba anti-soċjali minn residenti mhux Maltin.
Dawn il-multi jagħtu s-setgħa lill-pulizija tieħu azzjoni immedjata kontra persuni mhux residenti li jiksru l-liġi fi żmien 24 siegħa, filwaqt li t-turisti jistgħu saħansitra jiġu deportati jekk matul iż-żjara tagħhom jakkumulaw multi li jammontaw għal €200 jew aktar.
Kollox beda minn multa ta’ €150
L-Ispettur Nigel Buhagiar qal lill-qorti li l-inċident beda fis-sigħat bikrin tat-Tlieta barra Sky Club.
Il-pulizija lemħet wieħed miż-żgħażagħ jagħmel l-awrina fil-pubbliku u infurmatu li kien se jiġi mmultat €150 dak il-ħin.
L-uffiċjali qattgħu madwar 20 minuta jippruvaw jikkonvinċuħ iħallas il-multa, qabel ma f’daqqa waħda telaq jiġri.
Meta l-pulizija laħqitu, ħames uffiċjali ppruvaw iżommuh waqt taqbida li damet madwar 25 sekonda.
Skont l-Ispettur Buhagiar, iż-żagħżugħ irnexxielu jegħleb lill-uffiċjali, waqqagħhom mal-art u ħarab.
Persuni oħra intervjenew u għenuh jaħrab.
Uffiċjal tal-pulizija ġarrab ġrieħi ħfief.
Is-suspettat irritorna biex jiġbor il-karta tal-identità mitlufa
Il-prosekuzzjoni qalet li l-istess suspettat effettivament ta lilu nnifsu f’idejn il-pulizija jumejn wara.
Dakinhar tal-inċident, l-Għassa tal-Pulizija ta’ San Ġiljan irċeviet telefonata li fiha ġiet infurmata li persuna xtaqet tiġbor karta tal-identità li kienet tilfet aktar kmieni dak il-jum.
Sa dak il-ħin kien diġà nħareġ mandat ta’ arrest kontrih. Jumejn wara, il-Ħamis waranofsinhar, iż-żagħżugħ mar minn jeddu l-għassa biex jiġbor id-dokument, iżda ġie arrestat fuq il-post.
Huwa deher fil-qorti b’irkopptejh imdemmija. It-tieni żagħżugħ twaqqaf fl-ajruport It-tieni akkużat ġie maqbud ftit sigħat biss qabel ma kien se jitlaq minn Malta.
L-Ispettur Buhagiar qal li l-pulizija identifikatu permezz ta’ filmati tas-CCTV li wrewh jieħu sehem fil-ħarba.
Mill-investigazzjonijiet ħareġ li kien se jitlaq lura lejn Franza nhar il-Ġimgħa.
Il-pulizija arrrestatu fl-Ajruport Internazzjonali ta’ Malta qabel ma kien se jitla’ fuq it-titjira tiegħu.
It-tnejn jammettu l-akkużi
Iż-żewġ akkużati ammettew akkużi li jinkludu li ma obdewx l-ordnijiet tal-pulizija u li fixklu l-paċi pubblika.
Dominati ammetta wkoll li ġera b’mod traskurat, kif ukoll li għamel l-awrina fil-pubbliku.
It-tnejn ammettew ukoll li waqt it-taqbida kkawżaw ġrieħi ħfief lil uffiċjal tal-pulizija.
Kemm il-prosekuzzjoni kif ukoll id-difiża talbu li tingħata l-piena minima.
Il-Maġistrat Gabriella Vella differiet il-każ għas-sentenza għat-Tnejn fid-9:00 a.m.
L-avukat tal-għajnuna legali Alexia Vassallo dehret għall-akkużati.
.png)
.png)
