Raġel jinstab mejjet wara li ċediet bieba ta’ trakk f’Ħad-Dingli

Raġel ta' 74 sena minn Mellieħa tilef ħajtu wara inċident industrijali li seħħ il-Ġimgħa filgħodu fi Sqaq il-Kalkara, Dingli.

Il-Pulizija ġiet infurmata bl-inċident għall-ħabta tal-10am.

Skont l-ewwel investigazzjonijiet, il-bieba ta' wara ta' trakk waqgħet fuq ir-raġel, u qabditu bejn il-bieba tal-vettura u trekter li kien fil-viċin.

Fuq il-post issejjaħ tim mediku, iżda r-raġel ġie ċċertifikat mejjet.

Il-kelliem tal-Pulizija Brandon Pisani, li mar fuq il-post, ikkonferma l-mewt tar-raġel.

Il-Maġistrat Monica Borg Galea ġiet infurmata bil-każ u ħatret inkjesta maġisterjali.

L-investigazzjonijiet tal-Pulizija dwar iċ-ċirkostanzi tal-inċident għadhom għaddejjin.