George Degiorgio allega li t-taħditiet li kien qed ikollu mal-pulizija dwar maħfra presidenzjali nqatgħu ħesrem malli qal li kien lest jitkellem dwar Chris Cardona u Keith Schembri.
"Ladarba għednilhom li konna se nsemmu lilhom, keċċewna ’l barra," sostna Degiorgio quddiem il-ġurija waqt seduta mimlija tensjoni fil-ġuri ta’ Yorgen Fenech dwar il-qtil ta’ Daphne Caruana Galizia.
L-allegazzjoni kienet waħda minn sensiela twila ta’ dikjarazzjonijiet li Degiorgio għamel matul ġurnata li fiha semma ripetutament lil Chris Cardona, Keith Schembri u David Gatt, filwaqt li ppreżenta l-verżjoni tiegħu tal-allegat pjan tal-2015 u ta’ kif, skont hu, żviluppaw l-avvenimenti sas-sena 2017. Degiorgio ma ppreżenta l-ebda evidenza biex isostni dawn l-allegazzjonijiet. Chris Cardona, Keith Schembri u David Gatt dejjem ċaħdu kull involviment fil-qtil.
Is-seduta bdiet b’argument legali bejn il-prosekuzzjoni u d-difiża dwar in-notifika tax-xhieda. Id-difiża sostniet li kienet infurmata tard li l-aħwa Degiorgio kienu se jixhdu, filwaqt li l-prosekuzzjoni qalet li kienet qed tagħmel kull sforz biex tinforma lill-partijiet kemm jista’ jkun kmieni. L-Imħallef Edwina Grima ordnat li, fejn ikun possibbli, il-prosekuzzjoni tagħti 48 siegħa avviż dwar ix-xhieda li tkun se tressaq.
Qabel ma bdew jixhdu l-aħwa Degiorgio, il-kriminologu Saviour Formosa ppreżenta r-rikostruzzjoni tridimensjonali tax-xena tad-delitt, mibnija permezz ta’ laser scanning, proċess li qal ħa sitt xhur biex tlesta.
Alfred Degiorgio jirrifjuta jixhed
L-ewwel wieħed li tela’ fuq il-pedana kien Alfred Degiorgio.
Mill-ewwel iddikjara li kien se jixhed biss dwar "ħaġa waħda", iżda wara rrifjuta jwieġeb kważi kull mistoqsija li saritlu.
Minkejja li tenna diversi drabi li ma kellu "l-ebda dubju" li Chris Cardona, Keith Schembri u David Gatt kienu involuti fil-każ, huwa rrifjuta jispjega x’kien qed jirreferi għalih jew jippreżenta xi evidenza.
Meta l-Imħallef wissietu li kien obbligat jixhed, Degiorgio wieġeb li kien qed jikkontesta l-kundanna tiegħu quddiem il-Qorti Ewropea tad-Drittijiet tal-Bniedem u baqa’ jirrifjuta jwieġeb.
Wara li kompla ma jikkoperax, l-Imħallef ordnat li jitressaq il-Qorti fi żmien 48 siegħa biex jiffaċċja proċeduri ta’ disprezz tal-Qorti.
"Kieku nixhed, nixxokkjakom"
Ftit wara tela’ jixhed ħuh, George Degiorgio.
Anke hu beda b’konfront mal-Qorti. Qal li kien lest jitkellem dwar il-pjan allegat tal-2015 iżda mhux dwar il-qtil tal-2017, filwaqt li sostna li kieku jixhed bis-sħiħ "jixxokkja lil kulħadd."
F’ħin minnhom dar fuq il-ġurati u wissiehom biex "joqogħdu attenti", filwaqt li kellu diversi skambji ta’ kliem mal-prosekutur Godwin Cini.
Meta l-Imħallef immultatu €500 għal disprezz tal-Qorti, Degiorgio għajjat: "Agħmilhom €1,000 flok €500."
"L-ammonti niddeċidihom jien," wieġbet l-Imħallef.
Aktar tard ammetta li l-intenzjoni tiegħu kienet li ma jwieġeb l-ebda mistoqsija tal-prosekuzzjoni, filwaqt li kien aktar lest iwieġeb lid-difiża.
Il-verżjoni tiegħu tal-pjan tal-2015
L-akbar parti tax-xhieda kienet iddedikata għall-allegat pjan tal-2015.
Skont George Degiorgio, kien David Gatt li ċempillu u qallu biex jiltaqa’ ma’ Chris Cardona f’Portomaso.
Huwa sostna li hemmhekk Cardona qallu li ried li Daphne Caruana Galizia tinqatel għax "kienet se tkissrilhom il-partit."
Meta staqsieh kemm kien hemm bżonn flus, Degiorgio qal li talab €150,000.
Aktar tard, skont il-verżjoni tiegħu, saret laqgħa oħra f’Portomaso fejn ngħataw €50,000 bħala depożitu. Degiorgio qal li wara qassam €10,000 kull wieħed bejnu, Vince Muscat, David Gatt u Jamie Vella.
Huwa sostna li l-pjan kien li jwaqqfu lil Caruana Galizia fit-triq u jisparawlha.
Qal li għal diversi jiem ippruvaw isibuha iżda ma rnexxielhomx. F’okkażjoni minnhom, qal li rawha ssuq BMW qrib il-Ġnien tal-Għarusa, ippruvaw isegwuha iżda tilfuha.
Meta l-pjan waqa’, qal li David Gatt qallu biex iżomm il-flus u li hu kien se "jirranġa."
Degiorgio allega wkoll li Chris Cardona kien wegħedhom żewġ containers ta’ sigaretti tal-kuntrabandu kull sena u pompa tal-petrol fix-Xemxija, kif ukoll li kien se jipprovdilhom arma tan-nar tat-tip rifle permezz ta’ David Gatt.
Huwa sostna wkoll li l-patrols tal-pulizija fiż-żona kienu twaqqfu, u qal li "jassumi" li Cardona kien tkellem mal-Kummissarju tal-Pulizija dwar dan.
Il-qtil tal-2017
Meta l-prosekuzzjoni ppruvat tmexxi l-mistoqsijiet fuq il-qtil tal-2017, Degiorgio kien ferm aktar kawt.
Huwa rrifjuta jwieġeb diversi mistoqsijiet dwar il-preparamenti għall-qtil, il-movimenti tiegħu lejn il-Bidnija u r-rwol ta’ Vince Muscat.
Madankollu, ikkonferma li l-prezz mitlub għall-qtil kien ta’ €150,000 u li inizjalment kienu talbu depożitu ta’ €30,000.
Huwa qal ukoll li beda josserva l-movimenti ta’ Daphne Caruana Galizia qabel l-elezzjoni ġenerali tal-2017 u li kienu jużaw mobiles apposta għall-pjan.
Keith Schembri, Melvin Theuma u t-taħditiet dwar il-maħfra
Degiorgio semma diversi drabi lil Keith Schembri matul ix-xhieda tiegħu.
Sostna li Melvin Theuma kien qalilhom li kien qed jaġixxi f’isem Schembri, li kien ħeġġiġhom iħaffu bil-pjan u li aktar tard kien avżahom ġimagħtejn qabel l-arresti tagħhom.
Qal ukoll li, waqt li kien il-ħabs, Theuma kien tahom parir biex ikellmu lil Keith Schembri u lil Chris Cardona biex jippruvaw jiksbu l-libertà proviżorja.
Meta ntwera ritratt ta’ Theuma ma’ Schembri, Degiorgio qal li kien proprju meta talab li jitkellem dwar Schembri u Cardona waqt taħditiet dwar maħfra presidenzjali li, skont hu, il-pulizija waqqfu kollox.
"Hekk kif għednilhom li konna se nsemmu lilhom, keċċewna ’l barra," qal lill-ġurija.
Huwa sostna wkoll li kien ipprova jitkellem mal-investigaturi, mal-Kummissarju tal-Pulizija u mal-Avukat Ġenerali, iżda qal li l-awtoritajiet qatt ma riedu jisimgħuh.
"Kellna nies b'saħħithom warajna"
Ix-xhieda ta’ George Degiorgio laqtet ukoll ma’ dik li Vince Muscat ta l-ġurnata ta’ qabel.
Muscat kien qal li l-aħwa Degiorgio kienu qalulu jidħol il-Qorti b’rasu mgħollija biex juru li kellhom "nies b’saħħithom warajhom."
George Degiorgio qal li dak il-kliem kien ġie mingħand Melvin Theuma, għax, skont hu, "kellna lil Chris Cardona u Keith Schembri jgħinuna."
Jixhed is-Supretendent
Fl-aħħar tas-seduta beda jixhed is-Supretendent Nicholas Vella, li fl-2017 kien stazzjonat fl-Għassa tal-Mosta.
Vella ddeskriva lill-ġurija kif wasal fuq il-post tal-isplużjoni li qatlet lil Daphne Caruana Galizia u ta rendikont tal-ewwel intervent tal-pulizija u tax-xena tad-delitt.
Il-ġuri jkompli għada.
.png)
Is-seduta tal-lum issa ġiet fi tmiemha.
Matul il-ġurnata xehedu l-aħwa Alfred u George Degiorgio, b'George Degiorgio jagħmel sensiela ta' allegazzjonijiet fil-Qorti li semmew fost l-oħrajn lil Chris Cardona, Keith Schembri u David Gatt. Huwa ma ppreżenta l-ebda evidenza biex isostni dawn l-allegazzjonijiet, filwaqt li l-persuni msemmija ċaħdu kull involviment.
Aktar tard waranofsinhar beda jixhed ukoll is-Supretendent Nicholas Vella, li ddeskriva lill-ġurija x-xena tal-qtil ta' Daphne Caruana Galizia kif sabha meta wasal fuq il-post fl-2017.
Il-ġuri jkompli għada filgħodu.
Is-seduta kompliet bix-xhieda tas-Supretendent Nicholas Vella, li fl-2017 kien stazzjonat fl-Għassa tal-Pulizija tal-Mosta.
Vella spjega lill-ġurija kif wasal fuq il-post tal-qtil ta' Daphne Caruana Galizia u ddeskriva x-xena li sab quddiemu wara l-isplużjoni.
Ix-xhud qed jagħti rendikont tal-ewwel intervent tal-pulizija fuq il-post tad-delitt u tal-passi li ttieħdu fil-bidu tal-investigazzjoni.
George Degiorgio: "Kelli l-intenzjoni li ma nwieġeb l-ebda mistoqsija tal-prosekuzzjoni"
Waqt l-eżami mill-ġdid, il-prosekuzzjoni staqsiet lil George Degiorgio kif kien spjega li wieġeb il-mistoqsijiet tad-difiża b'mod ferm aktar estensiv milli dawk tal-prosekuzzjoni, li magħha kien spiċċa anke f'konfronti fl-awla.
Il-prosekuzzjoni: "Kif tispjega li weġibt lid-difiża u mhux lilna?"
George Degiorgio: "Biex ngħid is-sew, kelli l-intenzjoni li ma nwieġeb l-ebda mistoqsija tal-prosekuzzjoni."
George Degiorgio ġie mistoqsi dwar ix-xhieda li ta Vince Muscat nhar it-Tlieta, meta qal li l-aħwa Degiorgio kienu qalulu jidħol il-Qorti "b'rasu mgħollija" għax kellhom nies b'saħħithom warajhom.
Degiorgio sostna li dak il-kliem kien ġie mingħand Melvin Theuma.
George Degiorgio: "Melvin qalilna hekk għax kellna lil Chris Cardona u Keith Schembri jgħinuna."
George Degiorgio ma ppreżenta l-ebda evidenza biex isostni din l-allegazzjoni. Chris Cardona u Keith Schembri dejjem ċaħdu kull involviment fil-qtil ta' Daphne Caruana Galizia.
Wara dan, id-difiża għalqet il-kontro-eżami tagħha. Il-prosekuzzjoni mbagħad indikat li kellha aktar mistoqsijiet għax-xhud.
Matul il-kontro-eżami, George Degiorgio ntwera ritratt ta' Melvin Theuma flimkien ma' Keith Schembri.
Huwa kkonferma li, meta kien avviċina lill-pulizija biex jiddiskuti talba għal maħfra presidenzjali, kien qalilhom li ried jitkellem dwar Keith Schembri u Chris Cardona.
Degiorgio mbagħad daħak u allega: "Malli għednilhom li konna se nsemmu lilhom, il-pulizija keċċewna 'l barra."
Matul il-kontro-eżami, George Degiorgio reġa' sostna li, skont hu, Chris Cardona, David Gatt, Keith Schembri u dak li sejjaħ bħala "l-Kummissarju tal-Pulizija" kienu wara l-allegat pjan tal-2015.
Huwa kompla jgħid li, skont il-verżjoni tiegħu, fl-2017 kien Melvin Theuma li ġie għandhom, u żied:
George Degiorgio: "Kieku kien hemm xi ħadd ieħor warajh, kont inkun naf."
Degiorgio allega wkoll li Chris Cardona kien wegħedhom żewġ containers sigaretti tal-kuntrabandu fis-sena u pompa tal-petrol fix-Xemxija.
Matul il-kontro-eżami, George Degiorgio ġie kkonfrontat bix-xhieda ta' Vince Muscat, li qal li ma kien irċieva l-ebda flus mill-pjan tal-2015 li eventwalment tħassar.
George Degiorgio: "Żgur li ħa. U mar dritt il-casino biex jilgħabhom."
Aktar tard, l-avukata Giannella de Marco staqsietu jekk Melvin Theuma kienx qalilhom min kien wara l-allegat pjan tal-2017.
George Degiorgio: "Keith Schembri, żgur."
George Degiorgio ma ppreżenta l-ebda evidenza biex isostni dawn l-allegazzjonijiet.
Il-kontro-eżami ta' George Degiorgio kompla b'mistoqsijiet dwar min, skont hu, kien wara l-pjanijiet li kienu jiġu ppreżentati lilhom.
Giannella de Marco: "Int għidt li ridtu tkunu tafu għal min kontu qed taħdmu. Jiġifieri, meta kien jiġi xi ħadd bħal Melvin Theuma jew David Gatt, ridtu tkunu tafu min kien warajhom?"
George Degiorgio: "Mhux hekk."
L-avukata mbagħad staqsietu x'kien qallu, skont hu, Chris Cardona waqt l-allegata laqgħa tal-2015.
Giannella de Marco: "X'kien qallek Cardona?"
George Degiorgio: "Qalli li rridu noqtlu lil Daphne."
Meta de Marco staqsietu jekk Melvin Theuma kienx qallu min kien warajh, Degiorgio wieġeb:
George Degiorgio: "Iva. Qalilna li kien Keith Schembri."
Beda l-kontro-eżami ta' George Degiorgio mill-avukata Giannella de Marco.
Giannella de Marco: "Apparti l-flus, kontu mwiegħda wkoll pakketti sigaretti?"
George Degiorgio: "Iva, żgur. Mingħand Chris Cardona."
L-avukata kompliet tistaqsih dwar il-kuntatti ma' Chris Cardona.
Giannella de Marco: "Toni l-Iblaħ kien jinżel it-tinda?"
George Degiorgio: "Le."
Meta staqsietu min kien iwassal il-messaġġi mingħand Cardona, Degiorgio wieġeb li ma kinux jaslu fit-tinda, iżda li kien aktar imur ħuh għandu, filwaqt li qal li Vince Muscat kien iwasslu.
Huwa kkonferma wkoll li, skont hu, David Gatt kien jinżel spiss għandhom.
Il-prosekuzzjoni staqsiet lil George Degiorgio x'tip ta' informazzjoni kien jagħtihom Melvin Theuma waqt li hu u ħuh kienu l-ħabs.
George Degiorgio: "Kienet dwar il-ħelsien mill-arrest. Qalilna biex nitkellmu ma' Keith Schembri u Chris Cardona biex noħorġu bil-libertà proviżorja."
Degiorgio sostna wkoll li David Gatt darba kien qalilhom li kienu se jingħataw il-ħelsien mill-arrest.
Meta mistoqsi mill-ġdid mill-prosekuzzjoni, Degiorgio kkonferma wkoll li, skont hu, Melvin Theuma kien avżahom minn qabel dwar l-arrest tagħhom, u qal li kellhom madwar ġimagħtejn twissija qabel ma seħħew l-arresti.
Il-prosekuzzjoni għaddiet biex tistaqsi lil George Degiorgio dwar il-qtil ta' Daphne Caruana Galizia fl-2017.
Madankollu, wara li ta diversi dettalji dwar l-allegat pjan tal-2015, Degiorgio qal li mhux se jwieġeb mistoqsijiet dwar il-qtil tal-2017.
Huwa kkonferma li, waqt li kien il-ħabs, xi kultant kien ikellem lil Melvin Theuma permezz tat-telefon tal-ħabs.
Meta mistoqsi min kien l-avukat tiegħu dak iż-żmien, Degiorgio wieġeb:
George Degiorgio: "David Gatt kien jiġi jarani u jagħtini informazzjoni. Kelli avukat tal-għajnuna legali, għax ħadd ma ried jirrappreżentani."
Huwa kkonferma wkoll li aktar tard kien irrappreżentat mill-avukat William Cuschieri.
Meta l-prosekuzzjoni staqsietu min ħallas l-onorarji ta' Cuschieri, Degiorgio wieġeb b'mod sarkastiku:
George Degiorgio: "Il-flus waqgħu mis-sema. Ma tafux minn fejn ġew?"
George Degiorgio ma ta l-ebda spjegazzjoni oħra dwar din id-dikjarazzjoni.
Min hu Tyson Butcher
Jonathan Pace, magħruf bħala "Tyson", kien is-sid tal-ħanut tal-laħam Tyson Butcher. Huwa nqatel b'tiri ta' arma tan-nar fil-Fgura f'Ottubru tal-2014, f'dak li kien meqjus bħala qtil marbut mal-kriminalità organizzata.
Qabel il-qtil tiegħu, Pace kien ġie mixli bl-attentat ta' qtil ta' Vince Muscat (il-Koħħu), li kien sostna li Pace sparalu tliet darbiet fl-Imsida u ħallielu ġrieħi serji.
Meta mistoqsi jekk kellux iżid xi ħaġa dwar l-allegat pjan tal-2015, George Degiorgio qal li iva.
Skont hu, Chris Cardona kien qallu li kien se jqabbad lil David Gatt biex jagħtih arma tan-nar tat-tip rifle għall-pjan.
Aktar tard fix-xhieda tiegħu, Degiorgio għamel ukoll allegazzjoni separata dwar Vince Muscat u l-familja tiegħu, b'referenza għall-qtil ta' Jonathan Pace, magħruf bħala "Tyson", li seħħ fl-2014.
George Degiorgio ma ppreżenta l-ebda evidenza biex isostni dawn l-allegazzjonijiet.
George Degiorgio xehed li l-pjan oriġinali tal-2015 kien li jwaqqfu lil Daphne Caruana Galizia fit-triq u jisparawlha.
Huwa qal li, meta dak il-pjan ma twettaqx, David Gatt qallu: "Żomm il-flus, jiena nirranġa."
Degiorgio sostna wkoll li, wara li waqa' l-pjan tal-2015, ħadd ma reġa' kellimhom dwar il-qtil sakemm, skont hu, Melvin Theuma reġa' daħal fix-xena fl-2017.
Dawn huma allegazzjonijiet magħmula minn George Degiorgio waqt ix-xhieda tiegħu quddiem il-ġurija.
Il-prosekuzzjoni staqsiet lil George Degiorgio min, skont hu, kien ta l-ordni biex jieqfu l-patrols tal-pulizija fiż-żona.
George Degiorgio: "Jiena nassumi li Chris Cardona kien tkellem mal-Kummissarju tal-Pulizija."
Meta mistoqsi min kien il-Kummissarju tal-Pulizija dak iż-żmien, Degiorgio wieġeb li ma kienx ċert.
George Degiorgio: "Ma nafx. Naħseb kien Cutajar, imma m'iniex ċert."
George Degiorgio ma ppreżenta l-ebda evidenza biex isostni dawn l-allegazzjonijiet.
George Degiorgio kompla jagħti l-verżjoni tiegħu dwar l-allegat pjan tal-2015 biex tinqatel Daphne Caruana Galizia.
Skont hu, wara l-allegata laqgħa ma' Chris Cardona, bdew ifittxu lil Daphne Caruana Galizia iżda għal diversi jiem ma rnexxielhomx isibuha, u bdew jaqtgħu qalbhom.
Degiorgio qal li darba, waqt li kienu fil-Ġnien tal-Għarusa, lemħu lil Daphne Caruana Galizia għaddejja b'BMW.
George Degiorgio: "Saqna warajha, iżda tlifniha."
Huwa kompla jgħid li, aktar tard, David Gatt reġa' ċempillu biex jerġgħu jmorru Portomaso għal laqgħa oħra ma' Chris Cardona.
Skont Degiorgio, Cardona wasal aktar tard għal-laqgħa u tahom €50,000.
F'dan il-punt, Degiorgio għamel kumment sarkastiku lejn il-prosekuzzjoni dwar ix-xhieda li nstemgħet ilbieraħ.
Degiorgio sostna wkoll li, wara dik il-laqgħa, David Gatt talbu jagħtih is-sehem tiegħu mill-flus, u qal li fil-karozza qassam €10,000 kull wieħed bejnu, Vince Muscat, David Gatt u Jamie Vella.
Waqt l-eżami mill-ġdid, il-prosekutur Godwin Cini talab lil George Degiorgio jispjega x'ġara fl-2015.
Godwin Cini: "Spjega x'ġara fl-2015."
George Degiorgio: "Kont id-dar u ċempilli David Gatt. Qalli li ried ikellimni u talabni mmur niltaqa' ma' Chris Cardona."
Degiorgio qal li marru Portomaso, niżlu taraġ twil u sabu lil Cardona bilqiegħda ma' mejda.
George Degiorgio: "Morna qgħadna ħdejh u qalli, 'Irridkom toqtlu lil Daphne.' Jien għidtlu, 'Daphne min hi?' Qalli, 'Issa jgħidlek David.'"
Skont Degiorgio, Cardona mbagħad staqsieh kemm kien hemm bżonn flus.
George Degiorgio: "Jien għidtlu €150,000. Skont George, Cardona qallu li ma kienx jippurtah, "mhux flus tal-passaporti?'"
Meta l-prosekutur staqsieh għaliex, skont hu, Cardona ried li tinqatel Daphne Caruana Galizia, Degiorgio wieġeb li Cardona kien qal:
"Għax se tkissrilna l-partit."
Lura fl-awla fejn Godwin Cini se jkompli bil-mistoqsijiet
L-Imħallef Edwina Grima ordnat waqfa għall-ikel.
Il-proċeduri jerġgħu jibdew fit-3.00pm, meta mistenni jkompli jinstema' George Degiorgio quddiem il-ġurija.
Inkomplu nwasslulkom l-aġġornamenti diretti hekk kif terġa' tibda s-seduta.
Is-seduta eskalat f'konfront qawwi bejn George Degiorgio u l-prosekuzzjoni, b'Degiorgio jgħolli leħnu u jinterrompi ripetutament il-proċeduri.
Minkejja t-twissijiet tal-Imħallef Edwina Grima, Degiorgio baqa' ma obdiex l-ordnijiet tal-Qorti.
L-Imħallef iddikjaratu ħati ta' disprezz tal-Qorti u imponietlu multa ta' €500.
B'reazzjoni, Degiorgio għajjat mill-pedana: "Agħmilhom €1,000 flok €500."
L-Imħallef wieġbitu: "Jiena niddeċiedi l-ammonti hawnhekk."
Waqt ix-xhieda tiegħu, George Degiorgio allega li fl-2015 Chris Cardona kien qallu biex jiżgura li Daphne Caruana Galizia tinqatel, għax, skont hu, "kienet se teqred lill-Partit Laburista."
Il-prosekutur Godwin Cini kompla jistaqsih dwar id-dettalji tal-pjan tal-2017, iżda Degiorgio rrifjuta jidħol fil-mertu.
Godwin Cini: "X'kien jinvolvi eżatt il-pjan tal-2017?"
George Degiorgio: "Tlajna prezz biex ngħidu kollox. Issa tridu tisimgħu? Insejt issa."
Degiorgio sostna wkoll li kien ipprova jagħti l-verżjoni tiegħu lill-investigatur ewlieni tal-każ, lill-Kummissarju tal-Pulizija u lill-Avukat Ġenerali.
Il-prosekutur irrimarkalu li kien ġie kkuntattjat ħames darbiet biex jagħti l-verżjoni tiegħu.
George Degiorgio: "Għax aħna għamilna pressjoni fuq il-pulizija. Meta arrestajtuna, kellek tistaqsuna min bagħatna. M'għamiltux għax kontu diġà tafu min bagħatna."
George Degiorgio ma ppreżenta l-ebda evidenza biex isostni dawn l-allegazzjonijiet.
George Degiorgio xehed li beda josserva l-movimenti ta' Daphne Caruana Galizia qabel l-elezzjoni ġenerali tal-2017.
Huwa qal ukoll li jiftakar li Melvin Theuma kien qallu jħaffu bil-pjan.
Meta l-prosekutur Godwin Cini staqsieh jekk jiftakarx li Theuma qallu biex iwaqqfu l-pjan, Degiorgio wieġeb: "Jiena ma' Theuma ltqajt darba biss."
Degiorgio qal ukoll li qatt ma kien iċempel lil Vince Muscat bil-mobile, iżda li Muscat kien jinżel kuljum fit-tinda tal-patata fil-Marsa, li, skont hu, kienet il-post ewlieni fejn kienu jiltaqgħu.
Meta mistoqsi dwar il-mobiles li kienu jużaw, Degiorgio kkonferma li kellhom mobiles apposta għall-pjan tal-qtil.
George Degiorgio kompla jinsisti fuq l-allegazzjoni tiegħu li Keith Schembri kien il-persuna li avviċina lil Melvin Theuma bil-pjan tal-qtil, iżda ma pprovda l-ebda evidenza biex isostni din id-dikjarazzjoni.
Il-prosekutur Godwin Cini kompla jistaqsih dwar kif twettaq il-qtil, kemm kienu ilhom jafu bil-pjan, il-preparamenti li saru, ir-rwol ta' Vince Muscat u l-vjaġġ lejn il-Bidnija.
Għall-maġġoranza tal-mistoqsijiet, Degiorgio wieġeb b'"ma nafx", "ma ppreparajt xejn" u "mort il-Bidnija darba."
Madankollu, huwa kkonferma li l-prezz mitlub għall-qtil kien ta' €150,000.
Meta mistoqsi jekk dak l-ammont intalabx qabel jew wara l-elezzjoni ġenerali tal-2017, Degiorgio qal li ma kienx jaf, iżda żied li inizjalment kienu talbu depożitu ta' €30,000, filwaqt li l-bqija kellu jitħallas wara l-qtil.
George Degiorgio jgħid li ried jixhed fil-ġuri tiegħu iżda l-avukati qalulu li ma setax jixhed
George Degiorgio qal fil-Qorti li ried jixhed fil-ġuri tiegħu stess, iżda sostna li l-avukati tiegħu kienu qalulu li l-prosekuzzjoni ma kinitx qed tippermettilu jagħmel dan.
L-Imħallef Edwina Grima rrimarkat li, waqt il-proċeduri ta' dak il-ġuri, il-Qorti kienet staqsietu jekk xtaqx jixhed.
Degiorgio wieġeb li l-avukati tiegħu kienu qalulu li l-prosekuzzjoni ma kinitx qed tippermettilu jixhed, u staqsa: "Qed tgħiduli li l-avukati tiegħi giddibin?"
George Degiorgio jgħajjat fil-Qorti u jdur fuq il-ġurati: "Oqogħdu attenti"
Il-konfront bejn George Degiorgio u l-prosekuzzjoni eskala waqt ix-xhieda tiegħu.
Degiorgio beda jgħajjat lejn il-prosekutur Godwin Cini, qabel dar fuq il-ġurati u qalilhom: "Oqogħdu attenti."
L-Imħallef Edwina Grima sabtet fuq il-mejda u ordnatlu jieqaf immedjatament.
Il-prosekutur kompla jistaqsih għaliex ma kienx għamel dawn l-allegazzjonijiet quddiem il-maġistrat inkwerenti.
George Degiorgio: "Biex Keith Arnaud jibda jinvestiga. Lilna biss tellgħuna l-Qorti. Lil Keith Schembri ma tellgħuhx."
Degiorgio kompla jallega li ma tħalliex jixhed fil-ġuri tiegħu stess u kkritika l-mod kif, skont hu, tmexxew il-proċeduri.
Il-prosekutur Godwin Cini staqsa lil George Degiorgio għaliex għażel li jqajjem ċerti allegazzjonijiet issa, waqt il-ġuri ta' Yorgen Fenech.
Godwin Cini: "Għalfejn stennejt sal-ġuri ta' Yorgen Fenech biex tgħid ċerti affarijiet?"
George Degiorgio: "Ilbieraħ ma għidtlu xejn, imma Vince Muscat xehed fuq affarijiet ġodda wkoll. Falz ieħor int."
F'dan il-punt intervjeniet l-Imħallef Edwina Grima u waqqfet l-iskambju bejn ix-xhud u l-prosekutur.
Cini mbagħad staqsa lil Degiorgio kif kien jaf x'kien xehed Vince Muscat.
George Degiorgio: "Issa naf kif naf. Għandi s-sorsi tiegħi. Rajtu fuq l-aħbarijiet ux"
Il-prosekutur Godwin Cini staqsa lil George Degiorgio kif, skont hu, Chris Cardona kien daħal fil-każ.
George Degiorgio: "Għax fl-2015 kien Chris Cardona li tani l-ordnijiet. Tantx tistgħaġeb"
Il-prosekutur fakkru li, meta xehed waqt l-inkjesta maġisterjali u l-kumpilazzjoni tal-provi f'dan il-każ, qatt ma kien semma lil Keith Schembri.
Degiorgio wieġeb li, skont hu, "għax il-pulizija qatt ma ħadu azzjoni fuq dan. Għamilna sitt snin ninżlu d-Depot tal-pulizija. Min jemmen lill-pulizija huwa giddieb." Huwa żied jgħid “jien qatt ma kont tallab ta, bħalkom. Tittalbu mingħand il-ġagbini”
Wara li inizjalment irrifjuta jwieġeb il-mistoqsijiet, George Degiorgio beda jagħti xi dettalji dwar l-allegat komplott.
Godwin Cini: "Spjega x'ġara fit-2017"
George Degiorgio: "Ġie Melvin Theuma fit-tinda tal-patata u sab lili. Qalli, 'Ħa tħaffu?' Jien għidtlu, 'Mur għid lil Keith Schembri li la nlestu jkun jaf.'"
L-Imħallef Edwina Grima intervjeniet immedjatament.
L-Imħallef: "Imma għaliex għidtlu jmur jgħid lil Keith Schembri?"
George Degiorgio: "Għax kont naf li Keith Schembri kien... Aħna ridna nkunu nafu min bagħtu."
Il-prosekutur kompla jistaqsih.
Godwin Cini: "Inti għidt li qallek biex tħaffu. Min iktar kien involut?"
George Degiorgio: "Fejn jidħol ħija, jiena mhux se nitkellem."
Godwin Cini: "Tajjeb, issemmix lil ħuk."
George Degiorgio: "Jiena, Vince, Melvin Theuma, Chris Cardona, Keith Schembri, David Gatt..."
George Degiorgio jipponta lejn Yorgen Fenech u b’mod sarkastiku jgħid: "Iva ħolqa waħda baqa"
L-iskambju bejn George Degiorgio u l-Qorti kompla jsir aktar tens.
Waqt li kien qed jindirizza lill-Imħallef Edwina Grima, Degiorgio pponta lejn Yorgen Fenech u qal: "Ħolqa waħda baqga iva fil-ġuri, hekk qed tgħidu... Xi żball għandkom."
L-Imħallef wieġbet li hija tiddeċiedi biss il-każijiet li jitressqu quddiemha, u li ma kellhiex għażla dwar min jitressaq il-Qorti.
Degiorgio kompla jgħid li "ilhom jiġu ismijiet differenti quddiemek", waqt li kien qed jindirizza lill-Imħallef.
Il-prosekutur Godwin Cini staqsieh x'ried ifisser meta qal li kienet baqgħet "ħolqa waħda" fil-ġuri u min kien qed jgħid hekk.
Degiorgio wieġeb: "Intom. Inti l-ewwel wieħed. Il-prosekuzzjoni."
Jixhed George Degiorgio
Issa fuq il-pedana tax-xhieda tela' ħuh, George Degiorgio.
Meta l-prosekutur Godwin Cini talbu jispjega lill-ġurati l-involviment tiegħu fil-qtil ta' Daphne Caruana Galizia, George Degiorgio wieġeb li għadu qed jikkontesta l-każ.
L-Imħallef Edwina Grima rrimarkatlu li l-proċeduri f'Malta kienu ntemmu u li kien obbligat jixhed.
Degiorgio wieġeb li, għalih, dan "ma jagħmilx differenza", u meta l-Imħallef wissietu li setgħet tieħu passi kontrih jekk jirrifjuta jixhed, huwa qal: "Tista' tieħu li trid. Għandek xi erbgħin sena ħabs oħra?"
Degiorgio qal li kien lest jixhed dwar l-avvenimenti tal-2015, iżda mhux dwar il-każ tal-2017.
L-Imħallef wieġbitu li ma setax jagħżel dwar liema partijiet tal-każ jixhed, u fakkritu mill-ġdid fl-obbligu legali tiegħu li jwieġeb il-mistoqsijiet.
Il-Qorti tordna l-arrest ta' Alfred Degiorgio wara li rrifjuta jixhed
Wara li Alfred Degiorgio baqa' jirrifjuta jwieġeb il-mistoqsijiet tal-prosekuzzjoni u tad-difiża minkejja twissijiet ripetuti, l-Imħallef Edwina Grima ordnat l-arrest tiegħu.
Il-Qorti ddeċidiet li Degiorgio għandu jitressaq quddiem il-Qorti fi żmien 48 siegħa biex jiffaċċja proċeduri ta' disprezz tal-Qorti (contempt of court).
B'din id-deċiżjoni ntemmet formalment ix-xhieda ta' Alfred Degiorgio fil-ġuri ta' Yorgen Fenech.
Alfred Degiorgio jtenni l-allegazzjonijiet iżda jirrifjuta jissostanzjahom
Waqt l-eżami mill-ġdid, il-prosekutur Godwin Cini staqsa lil Alfred Degiorgio x'ried ifisser meta qal li Chris Cardona, Keith Schembri u David Gatt kienu involuti fil-każ.
Degiorgio wieġeb li ma kienx se jwieġeb, iżda tenna li "m'għandi l-ebda dubju li huma involuti."
Meta Cini staqsieh biex jissostanzja din id-dikjarazzjoni, Degiorgio ma ta l-ebda spjegazzjoni konkreta. Minflok, għamel allegazzjoni oħra, fejn sostna li l-Assistent Kummissarju Keith Arnaud kien ħalla lil Keith Schembri "inaddaf l-uffiċċju tiegħu" qabel ma ġie arrestat.
Degiorgio ma pprovda l-ebda dettall jew evidenza biex isostni dawn l-allegazzjonijiet u baqa' jirrifjuta jwieġeb il-mistoqsijiet tal-prosekuzzjoni.
Alfred Degiorgio jistaqsi lill-Qorti dwar protezzjoni għall-familja tiegħu
Qabel il-prosekuzzjoni kompliet bil-mistoqsijiet tagħha, l-Imħallef Edwina Grima reġgħet wissiet lil Alfred Degiorgio li għandu obbligu legali li jixhed.
Degiorgio wieġeb billi staqsa lill-Qorti "xi protezzjoni ħa tagħti inti lill-familja tiegħi jekk nixhed?
L-Imħallef wieġbet li, jekk ikun hemm bżonn, il-Qorti hija lesta tipprovdi l-protezzjoni kollha meħtieġa, filwaqt li osservat li jekk dik kienet il-biża' tiegħu, il-Qorti kienet disponibbli tieħu l-miżuri neċessarji.
Il-proċeduri mbagħad komplew bil-mistoqsijiet mill-ġdid tal-prosekuzzjoni.
Wara l-pawża, l-Imħallef Edwina Grima u l-ġurati reġgħu daħlu fl-awla, filwaqt li Alfred Degiorgio kompla fuq il-pedana tax-xhieda.
L-avukata Giannella de Marco staqsietu dwar rekords ta' telefonati li, skont hi, juru kuntatti bejn Degiorgio u David Gatt bejn Jannar u Ottubru tal-2017.
Madankollu, Degiorgio baqa' jirrifjuta jwieġeb il-mistoqsijiet.
Wara dan, de Marco informat lill-Qorti li ma kellhiex aktar mistoqsijiet għax-xhud
L-awla terġa' tibda fost interess kbir
Il-proċeduri reġgħu bdew wara l-pawża.
L-awla hija mimlija sa ruħ ommha, b'interess qawwi fis-seduta tal-lum. L-gallarija pubblika hija kompletament mimlija, hekk kif numru kbir ta' persuni qed isegwu mill-qrib ix-xhieda ta' Alfred Degiorgio.
Is-seduta issa mistennija tkompli bil-kontro-eżami tiegħu.
L-Imħallef Edwina Grima ordnat pawża qasira fis-seduta.
Il-proċeduri mistennija jerġgħu jibdew fi ftit minuti, bil-kontro-eżami ta' Alfred Degiorgio mistenni jkompli.
Alfred Degiorgio jirrepeti allegazzjoni dwar Cardona, Gatt u Schembri iżda jirrifjuta jispjegaha
Matul il-kontro-eżami, l-avukata Giannella de Marco talbet lil Alfred Degiorgio jirrepeti dak li kien qal fil-bidu tax-xhieda tiegħu.
Degiorgio wieġeb: "M'għandi l-ebda dubju li Chris Cardona, David Gatt u Keith Schembri huma involuti f'dan il-każ."
Meta de Marco staqsietu għaliex kien qed jgħid dan, Degiorgio irrifjuta jwieġeb, u qal biss: "Mhux se nwieġeb."
Degiorgio ma ta l-ebda spjegazzjoni jew evidenza biex isostni din id-dikjarazzjoni u baqa' jirrifjuta jwieġeb il-mistoqsijiet li sarulu.
Alfred Degiorgio: "Kieku nixhed, nixxokkjakom ilkoll"
Il-prosekutur Godwin Cini fakkar lil Alfred Degiorgio li nstab ħati tal-qtil ta' Daphne Caruana Galizia u li dik il-kundanna ġiet ikkonfermata fl-appell, filwaqt li rrimarkalu li l-liġi tobbligah jixhed.
Degiorgio baqa' jirrifjuta, u wieġeb: "Ma nwieġebx. Kieku nixhed, nixxokkjakom ilkoll."
Alfred Degiorgio jirrifjuta jwieġeb il-mistoqsijiet kollha tal-prosekuzzjoni
Alfred Degiorgio rrifjuta jwieġeb il-mistoqsijiet kollha li sarulu mill-prosekuzzjoni hekk kif tela' fuq il-pedana tax-xhieda.
Meta l-prosekutur Godwin Cini fakkru li, wara l-kundanna tiegħu, il-liġi tobbligah jixhed, Degiorgio wieġeb: "Ma nwieġebx."
L-Imħallef Edwina Grima qaltlu li kien obbligat jixhed, iżda Degiorgio wieġeb li ma kienx se jixhed.
Huwa qal li għandu każ pendenti quddiem il-Qorti Ewropea tad-Drittijiet tal-Bniedem, u allega li l-imħallef Edwina kisritlu d-drittijiet fundamentali.
Il-prosekuzzjoni kompliet tistaqsih min avviċinah biex joqtol lil Daphne Caruana Galizia, għaliex ried isir il-qtil, min kien involut, min wassallu l-ordni u x'kien il-prezz mitlub.
Għal kull mistoqsija, Degiorgio wieġeb bl-istess kliem: "Ma nwieġebx."
L-Imħallef staqsietu għaliex kien qed jirrifjuta jwieġeb, u huwa qal sempliċement li ma riedx.
Grima wissietu li l-Qorti setgħet tieħu passi kriminali kontrih jekk jibqa' jirrifjuta jixhed, iżda Degiorgio baqa' ma weġibx il-mistoqsijiet.
Anke meta ġie mistoqsi dwar ħuh George Degiorgio u ħuh Mario Degiorgio, huwa baqa' jirrispondi biss: "Ma nwieġebx."
Alfred Degiorgio jgħid li mhux se jwieġeb mistoqsijiet dwar il-każ minħabba proċeduri quddiem il-Qorti Ewropea
Waqt il-proċeduri, ix-xhud qal li kien lest jixhed fuq punt wieħed biss u mhux se jidħol f'aktar dettalji dwar il-każ.
Meta beda jsemmi lil Chris Cardona u Keith Schembri, l-Imħallef waqqfitu milli jkompli.
Ix-xhud spjega li ma setax iwieġeb mistoqsijiet dwar dawk il-punti għax qed jikkontesta l-każ quddiem il-Qorti Ewropea tad-Drittijiet tal-Bniedem.
Huwa żied ukoll li, sa fejn jiftakar hu, qatt ma ammetta l-akkużi.
Il-ġurati reġgħu daħlu fl-awla u l-Imħallef Edwina Grima għaddiet kumment qasir lill-partijiet, fejn qalet li l-ġurati qed iqisu dawn il-waqfiet frekwenti bħala "ħela ta' ħin."
Minnufih beda jinstema' l-ewwel xhud tal-ġurnata, il-kriminologu Saviour Formosa.
Formosa qal lill-Qorti li kien ingħata l-inkarigu jirrikostruixxi x-xena tal-qtil permezz ta' mappa tridimensjonali (3D).
Huwa ppreżenta diversi dokumenti u materjal lill-Qorti, fosthom filmati mix-xena tal-qtil u filmati tal-vettura ta' Daphne Caruana Galizia.
Ix-xhud spjega li d-data nġabret permezz ta' laser scanning, proċess li, skont hu, ħa madwar sitt xhur biex tlesta.
L-Imħallef Edwina Grima ċaħdet l-oġġezzjoni tad-difiża wara li semgħet l-argumenti taż-żewġ naħat.
Il-Qorti fakkret lid-difiża li l-Uffiċċju tal-Avukat Ġenerali ma jwettaqx investigazzjonijiet, b'referenza għall-kumment li sar waqt l-iskambju bejn il-partijiet.
L-Imħallef osservat ukoll li, minħabba d-daqs u l-kumplessità tal-ġuri, il-Qorti ilha ssegwi sistema fejn il-prosekuzzjoni tinforma lill-partijiet bix-xhieda li tkun biħsiebha tressaq fis-seduta ta' wara, sabiex ikollhom ħin adegwat biex jippreparaw ruħhom.
Madankollu, il-Qorti ordnat lill-prosekuzzjoni biex, sa fejn ikun possibbli, tagħti avviż ta' 48 siegħa kemm lill-Qorti kif ukoll lid-difiża dwar ix-xhieda u d-dokumenti li tkun beħsiebha tippreżenta fis-seduti li jmiss.
L-argument dwar il-lista tax-xhieda kompla b'reazzjoni mill-prosekutur Anthony Vella, li qal li l-prosekuzzjoni qed tagħmel minn kollox biex tinforma lill-Qorti u lid-difiża bl-ismijiet tax-xhieda kemm jista' jkun kmieni.
Vella qal ukoll li l-prosekuzzjoni kienet "perplessa" bl-oġġezzjoni tad-difiża, meta din stess ippreżentat dokumenti fil-Qorti li ma kinux jagħmlu parti mill-provi esebiti fil-ġuri.
L-avukat tad-difiża Charles Mercieca wieġeb minnufih, u qal li kien sorpriż li l-prosekuzzjoni kienet qed tiffoka fuq dak il-punt minflok tinvestiga lil Chris Cardona u lil Keith Schembri.
Mistennijin jixhdu l-aħwa Degiorgio
Qabel iddaħħlu l-ġurati fl-awla, id-difiża qajmet punt ta' liġi dwar il-lista tax-xhieda.
L-avukat Charles Mercieca sostna li l-prosekuzzjoni kienet obbligata tinforma lid-difiża bl-ismijiet tax-xhieda mill-inqas jumejn qabel ma dawn jixhdu fil-Qorti.
Huwa qal li dan ma seħħx, hekk kif id-difiża ġiet infurmata lbieraħ biss li ċerti xhieda, fosthom l-aħwa Degiorgio, huma mistennija jixhdu matul is-seduta tal-lum.
Il-Qorti mistennija tisma' l-argumenti tal-partijiet qabel tiddeċiedi dwar il-punt imqajjem.
Bongu u merħba għall-aġġornamenti diretti tagħna mit-13-il jum tal-ġuri ta' Yorgen Fenech dwar il-qtil ta' Daphne Caruana Galizia.
Wara li lbieraħ intemmet ix-xhieda ta' Vince Muscat ("Il-Koħħu"), illum il-Qorti mistennija tisma' xhud ġdid, hekk kif il-proċeduri quddiem l-Imħallef Edwina Grima jkomplu.
Se nkunu qed inwasslulkom l-iżviluppi kollha mill-awla tal-Qorti, hekk kif iseħħu matul il-ġurnata.