Sid ta’ ristoranti li ġie estradit mill-Italja biex jaffaċċja allegazzjonijiet ta’ evażjoni tat-taxxa u ħasil ta’ flus li jinvolvu aktar minn €2 miljun baqa’ miżmum arrestat wara li l-Qorti ċaħdet it-talba tiegħu għall-ħelsien mill-arrest.
Minkejja dan, il-Qorti semgħet li Giuseppe Napolitano lest jirregolarizza l-pożizzjoni tiegħu mal-awtoritajiet tat-taxxa bis-saħħa ta’ liġi li ġiet introdotta s-sena li għaddiet, li tħallih jilħaq ftehim barra l-qorti.
Napolitano, ta’ 53 sena, hu s-sid tar-ristoranti Storie e Sapori, li jinsabu San Ġiljan u l-Gżira. Huwa wieġeb mhux ħati għall-akkużi miġjuba kontrih.
Il-Qorti kkonfermat ukoll ordni ta’ ffriżar fuq l-assi tiegħu. Napolitano ġie miġjub lura Malta wara li l-Qorti tal-Appell ta’ Napli ordnat l-estradizzjoni tiegħu fuq is-saħħa ta’ Mandat ta’ Arrest Ewropew maħruġ mill-awtoritajiet Maltin
Napolitano diġà għandu diversi proċeduri legali oħra pendenti kontrih.
Irregolaritajiet finanzjarji fir-restorani
Il-każ infetaħ minn allegati irregolaritajiet finanzjarji fir-ristoranti tiegħu. Rapport imħejji mill-FCID wera li, fir-ristorant tal-Gżira biss, tranżazzjonijiet li jammontaw għal €238,131 allegatament tneħħew mis-sistema bejn Jannar tal-2020 u s-16 ta’ Awwissu 2021, filwaqt li tranżazzjonijiet oħra b’valur ta’ €53,942 ġew immarkati ‘mhux validi’.
Huma identifikaw ukoll madwar €1.65 miljun f’tranżazzjonijiet marbuta mar-ristorant ta’ San Ġiljan.
L-investigazzjoni waslet ukoll għall-konklużjoni li Napolitano allegatament kellu aktar minn €2 miljun dovuti f’taxxa għall-perjodu ta’ bejn l-2016 u l-2024.
Meta l-pulizija marret biex tarrestah irriżulta li Napolitano ma kienx għadu Malta.
L-awtoritajiet aktar tard sabuh fl-Italja, fejn ġie arrestat wara l-ħruġ tal-Mandat ta’ Arrest Ewropew.
Id-difiża tgħid li lest iħallas id-dejn tat-taxxa
L-avukat difensur Jason Azzopardi qal lill-Qorti li r-raġel kien lest jirregolarizza l-pożizzjoni tiegħu mal-awtoritajiet tat-taxxa permezz tal-Att XXX tal-2025, li introduċa mekkaniżmu ta’ ftehim barra l-qorti għal ċerti reati relatati mat-taxxa.
Azzopardi qal li kien iltaqa’ mal-Kummissarju għat-Taxxi u d-Dwana Joseph Caruana, u li kien hemm skambju ta’ emails dwar ftehim possibbli ladarba Napolitano jiġi akkużat fil-Qorti.
“Il-klijent tiegħi ħalla djun warajh, iva. Ħalla djun warajh, iżda jinsab f’pożizzjoni li jgħid li lest iħallas dak kollu li hu dovut,” argumenta Azzopardi.
Huwa qal li l-allegazzjonijiet kienu fil-biċċa l-kbira tagħhom marbuta mal-VAT u li Napolitano ried iħallas dak li allegatament naqas milli jħallas lill-Istat Malti.
Il-Prosekuzzjoni oġġezzjonat u argumentat li d-diskussjonijiet dwar ftehim tat-taxxa ma kellhomx x’jaqsmu mat-talba għall-ħelsien mill-arrest, li kellha tiffoka fuq jekk kienx hemm riskju li l-akkużat jaħrab.
“Min hu maħrub ma jmexxix restorant f’Napli”
Azzopardi sfida wkoll it-teżi tal-prosekuzzjoni li qalet li Napolitano kien persuna maħruba mill-ġustizzja.
Huwa qal li madwar sena ilu kien avviċina minn jeddu lill-FCID u informa lill-uffiċjali, fosthom lis-Supretendent Jonathan Ransley, li l-klijent tiegħu kien jinsab f’Napli, fejn kien qed imexxi restorant, u kien lest jirritorna Malta meta jkun mitlub.
“Min hu maħrub ma jmurx fil-port ta’ Napli u jmexxi restorant b’ritratt tiegħu kbir barra!” esklama Azzopardi.
L-Ispettur Shamus Woods wieġeb li dak kien dak li kienet qalet id-difiża lill-investigaturi, iżda qal li ma jaqbilx ma’ din l-interpretazzjoni.
Il-Prosekuzzjoni argumentat li minkejja d-diskussjonijiet mal-Pulizija, Napolitano xorta kien oppona l-estradizzjoni tiegħu lejn Malta u kien ikkontesta l-Mandat ta’ Arrest Ewropew fil-qrati Taljani sal-aħħar.
Meta l-Prosekuzzjoni ssuġġeriet li l-kuntatti preċedenti mal-Pulizija setgħu kienu biss tentattiv biex tinħoloq dehra ta’ kooperazzjoni, Azzopardi qam minn postu u qal:
“Ma tgħidlix li kienet mise en scène. Qed titfa’ t-tajn fuqi,” qal lill-Prosekuzzjoni.
It-tfal ma jistgħux ikunu garanti
Il-Qorti semgħet ukoll argumenti dwar jekk iben Napolitano setax jaġixxi bħala terz garanti.
Id-difiża kienet ipproponiet li ibnu, li ilu jgħix Malta għal 13-il sena u li jmexxi parti min-negozju tal-familja, ikun jista’ jagħti garanzija għall-ħelsien mill-arrest.
Madankollu, il-Prosekuzzjoni oġġezzjonat u qalet li ibnu wkoll huwa suspettat fl-investigazzjoni u għalhekk ma setax ikun garanti indipendenti.
Il-Qorti ċaħdet it-talba, filwaqt li nnutat li ibnu kien diġà ngħata l-libertà mill-Pulizija b’kundizzjonijiet (police bail) fil-każ.
Il-Prosekuzzjoni qajmet ukoll dubji dwar dokumenti relatati mar-residenza ta’ ibnu, u argumentat li ismu lanqas ma kien jidher fuq il-kuntratt tal-kera ppreżentat.
Il-Qorti tiċħad il-ħelsien mill-arrest
Fid-deċiżjoni tagħha, il-Qorti qalet li qieset is-sottomissjonijiet kollha magħmula mill-avukati u l-provi mressqa mid-difiża.
Hija nnutat li d-difiża kienet ibbażat it-talba tagħha għall-ħelsien mill-arrest fuq il-kuntatti li Azzopardi kellu mal-uffiċjali tal-Pulizija u fuq id-diskussjonijiet mal-awtoritajiet tat-taxxa dwar jekk kienx possibbli jintlaħaq ftehim.
Il-Qorti qalet li ma kellhiex għalfejn tiddubita dak li qal l-avukat difensur u ma ratx il-ħtieġa li dan jiġi kkonfermat taħt ġurament.
Madankollu, il-Qorti qalet li kellha tqis it-tħassib tal-Prosekuzzjoni dwar ir-riskju ta’ ħarba.
Hija osservat li mid-deċiżjoni tal-Qorti tal-Appell ta’ Napli jirriżulta li Napolitano kien oppona l-estradizzjoni tiegħu, għalkemm qalet li dan waħdu ma setax jitqies bħala prova li ried jevita l-ġustizzja Maltija.
Fid-dawl tas-serjetà tal-allegazzjonijiet u l-fatt li l-prosekuzzjoni għadha ma bdietx tippreżenta l-provi tagħha, il-Qorti ddeċidiet li ċ-ċirkostanzi ma ġġustifikawx il-ħelsien mill-arrest.
It-talba għall-ħelsien mill-arrest ġiet miċħuda.
Il-prosekuzzjoni tmexxiet mill-avukati tal-Avukat Ġenerali Claire Sammut u Mauro Abela flimkien mal-Ispettur Shamus Woods.
Għal Napolitano dehru l-avukati Jason Azzopardi, Kris Busietta u Alessandro Farrugia.
.png)
