Żewġ ċittadini Somali tressqu quddiem il-Qorti tal-Maġistrati fi proċeduri separati wara li allegatament inqabdu jittraffikaw id-droga f'Paceville waqt operazzjoni ta' sorveljanza tal-Pulizija.
F'wieħed mill-każijiet, Ahmed Abdi Mohamed ta' 25 sena ammetta l-akkużi ta' traffikar tal-kannabis u bejgħ ta' kokaina. Wara l-ammissjoni tiegħu, il-Qorti kkundannatu għal sena ħabs effettiva u mmultatu €500.
Fi proċeduri separati, Mowlid Ahmed Salah ta' 23 sena wieġeb mhux ħati għall-akkużi ta' pussess ta' kannabis u kokaina f'ċirkostanzi li jindikaw li d-droga kienet maħsuba għat-traffikar.
Il-Qorti semgħet li uffiċjali tal-Iskwadra tad-Droga, assistiti minn Pulizija tad-Distrett ta' San Ġiljan u mit-Tim tal-Community Policing, kienu qed iwettqu sorveljanza f'Paceville is-Sibt meta allegatament osservaw liż-żewġ akkużati involuti f'allegata tranżazzjoni ta' droga ma' raġel Taljan li kien qed jipprova jixtri l-kannabis.
Wara l-intervent tal-Pulizija, saret tfittxija fuq Salah, fejn allegatament instabu diversi qratas b'sustanzi suspettati li huma kannabis u kokaina.
Il-Maġistrat Yana Micallef Stafrace ċaħdet it-talba għall-ħelsien mill-arrest ta' Salah u ordnat li jinżamm taħt arrest preventiv sakemm ikomplu l-proċeduri.
Il-prosekuzzjoni tmexxiet mill-avukat Nadia Ciappara mill-Uffiċċju tal-Avukat Ġenerali flimkien mal-Ispetturi Nico Zarb u James Turner. Ahmed Abdi Mohamed kien rappreżentat mill-avukat Mark Anthony Mifsud Cutajar, filwaqt li Mowlid Ahmed Salah kien assistit mill-avukati Franco Debono, Adreana Zammit u Eman Scicluna.
