L-MP Nazzjonalista Darren Carabott qal li l-Ispeaker tal-Kamra, Carmelo Abela, wera r-rieda li jlaqqa' sensiela ta' laqgħat biex tiġi eżaminata l-possibbiltà li jitneħħew il-barriers li jdawru l-bini tal-Parlament fil-Belt Valletta.
F'post fuq il-midja soċjali, Carabott qal li reġa' qajjem is-suġġett mal-Ispeaker, li ilu fil-kariga biss ftit jiem, u qal li rċieva indikazzjoni li hemm rieda biex jiġu diskussi soluzzjonijiet possibbli.
Il-kwistjoni kienet tqajmet ukoll permezz ta' mistoqsija parlamentari li Carabott għamel fit-23 ta' Ġunju, fejn staqsa jekk hemmx pjanijiet biex jitneħħew il-barriers u x'inhi r-raġuni għaliex għadhom hemm.
Bi tweġiba fil-Parlament, l-Ispeaker qal li se jlaqqa' l-laqgħat meħtieġa sabiex tinstab soluzzjoni li żżomm il-bilanċ bejn is-sigurtà tal-bini, tal-Membri Parlamentari, tal-ħaddiema u tal-pubbliku li jżur il-Parlament.
Il-barriers kienu twaqqfu fl-2019 wara l-protesti li segwew ir-rivelazzjonijiet marbuta mal-qtil tal-ġurnalista Daphne Caruana Galizia.
Carabott sostna li matul is-snin dejjem ingħata l-istess spjegazzjoni, jiġifieri li l-barriers huma meħtieġa għal raġunijiet ta' sigurtà, iżda qal li jemmen li jeżistu mezzi aħjar biex din tiġi żgurata.
Huwa argumenta li dawn il-barriers jagħtu dehra negattiva lid-daħla tal-Belt Valletta u joħolqu kontradizzjoni, peress li l-politiċi jmorru jiltaqgħu man-nies biex jitolbu l-fiduċja tagħhom, iżda l-bini li jirrappreżentahom jibqa' magħluq wara barrieri.
Carabott temm jgħid li l-Parlament kien iddisinjat biex ikun miftuħ u aċċessibbli għall-pubbliku, u għalhekk għandu jinstab mod ieħor kif tiġi żgurata s-sigurtà mingħajr ma jiġu ostakolati ċ-ċittadini.
