Mara ta’ 72 sena ssofri ġrieħi gravi wara li waqgħet ġo xaft f’dar f'Kerċem

Mara ta’ 72 sena sofriet ġrieħi gravi wara li waqgħet minn għoli ta’ sular ġo xaft f’residenza f’Kerċem, Għawdex.

L-inċident seħħ għall-ħabta tal-5:00pm tal-Ħamis fi Triq Ta’ Berrini, meta l-Pulizija ġiet imsejħa biex tassisti fuq il-post.

Mill-ewwel stħarriġ irriżulta li l-mara, li hija residenti Kerċem, waqgħet minn għoli ta’ madwar sular ġo xaft li jinsab fir-residenza.

Fil-post issejħu membri tad-Dipartiment tal-Protezzjoni Ċivili kif ukoll tim mediku, li ta l-ewwel assistenza lill-mara qabel ma ttieħdet b’ambulanza l-Isptar Ġenerali t’Għawdex.

Fl-isptar hija ġiet iċċertifikata li qed issofri minn ġrieħi gravi.

Bil-każ ġie infurmat il-Maġistrat Jean Paul Grech, li fetaħ inkjesta maġisterjali, filwaqt li l-investigazzjonijiet tal-Pulizija għadhom għaddejjin.