Raġel ta' 28 sena li jaħdem fis-settur tal-kostruzzjoni ngħata l-ħelsien mill-arrest wara li wieġeb mhux ħati għal sensiela ta' akkużi serji, fosthom li allegatament stupra lill-martu, aggrediha sesswalment u wettaq diversi atti ta' vjolenza domestika fil-konfront tagħha.
L-imputat, ċittadin Sirjan residenti Ħaż-Żebbuġ, tressaq il-Qorti wara li martu ressqet rapport lill-pulizija fid-19 ta' Ġunju fejn allegat li kienet ġiet stuprata ripetutament, aggreditha fiżikament u sofriet diversi forom ta' abbuż domestiku.
Il-Qorti semgħet li l-koppja għandhom tifla ta' sentejn u nofs u kienu qed jgħixu flimkien sakemm il-vittma allegata telqet mid-dar matrimonjali wara l-allegati inċidenti u marret tgħix ma' ommha.
Intqal ukoll li, f'diversi okkażjonijiet, l-imputat allegatament ħeġġeġ lill-martu biex tieħu lit-tifla tagħhom ta' sentejn u nofs lejn il-Libja. Din l-allegazzjoni kienet fost ir-raġunijiet invokati mill-prosekuzzjoni biex topponi t-talba għall-ħelsien mill-arrest.
Id-difiża ma kkontestatx il-validità tal-arrest, li ġie kkonfermat mill-Qorti. L-imputat wieġeb mhux ħati għall-akkużi kollha miġjuba kontrih.
Meta talbet il-ħelsien mill-arrest, id-difiża sostniet li l-imputat ilu jgħix Malta għal aktar minn seba' snin, għandu residenza stabbli, jaħdem fil-kostruzzjoni u għandu rabtiet sodi mal-pajjiż.
Il-prosekuzzjoni oġġezzjonat għat-talba, filwaqt li argumentat li l-vittma allegata, li għandha 21 sena, għadha ma xehditx u għad hemm riskju reali li ssir interferenza max-xhieda. Intqal ukoll li meta l-pulizija spjegaw lill-vittma s-serjetà tal-allegazzjonijiet, hija dehret viżibilment ixxukkjata.
Wara li semgħet is-sottomissjonijiet taż-żewġ naħat, il-Qorti laqgħet it-talba għall-ħelsien mill-arrest iżda imponiet numru ta' kundizzjonijiet stretti. L-imputat ġie ordnat ma javviċinax jew jikkuntattjax lill-vittma allegata, lil ommha jew lit-tifla minorenni tagħhom, filwaqt li nħarġet ordni ta' protezzjoni favur tagħhom.
Il-Qorti ddeċidiet ukoll li l-ordni ta' protezzjoni favur it-tifla tibqa' fis-seħħ sakemm Qorti kompetenti tordna mod ieħor. Jekk Qorti oħra tirregola l-aċċess għat-tifla, l-imputat ikun jista' jeżerċita dawk id-drittijiet biss skont dak li tkun ordnat dik il-Qorti.
Fost il-kundizzjonijiet tal-ħelsien mill-arrest, l-imputat irid jiffirma kuljum f'għassa tal-pulizija, josserva ħin ta' rkażar bejn it-8.00pm u l-5.00am, jiddepożita l-passaport tiegħu, ma jitlaqx minn Malta u ma jikkommettix reat ieħor. Huwa ġie ordnat ukoll jiddepożita €10,000 u jipprovdi garanzija personali ta' €40,000.
Il-prosekuzzjoni tmexxiet mill-Ispettur Omar Zammit, assistit mill-Avukat tal-Avukat Ġenerali Cynthia Tomasuolo. L-imputat kien assistit mill-avukati Peter Fenech, Matthew Xuereb u Francesca Vella.
Il-każ ġie presedut mill-Maġistrat Claire Stafrace Zammit.
.png)
