Ċittadin Serb ġie kkundannat tmien snin ħabs wara li ammetta li kien involut f'serqa armata vjolenti f'residenza fin-Naxxar li ħalliet lill-vittma bi ġrieħi permanenti.
Viktor Markovic instab ħati mill-Qorti Kriminali wara li ammetta sensiela ta' akkużi marbuta mas-serqa li seħħet fit-23 ta' Novembru 2022 fil-kumpless Victoria Mansions fi Pjazza Toni Bajada.
Skont id-dokumenti tal-Qorti, Markovic aġixxa flimkien ma' persuni oħra biex iwettaq is-serqa, li matulha nsterqu aktar minn €2,300 fi flus kontantiħ
Il-Qorti semgħet kif il-vittma ġiet attakkata u marbuta waqt l-inċident, filwaqt li l-ħallelin użaw il-vjolenza u t-theddid biex iwettqu s-serqa. Markovic instab ħati wkoll li żamm lill-vittma kontra r-rieda tagħha u li kkawżalha ġrieħi gravi li wasslu għal kumplikazzjonijiet permanenti f'saħħitha.
Huwa nstab ħati wkoll li kellu arma tan-nar mingħajr il-liċenzja meħtieġa waqt it-twettiq tar-reat, kif ukoll li pprova jaħbi l-evidenza billi qered provi qabel ma nbdew il-proċeduri kriminali.
Il-prosekuzzjoni u d-difiża kienu infurmaw lill-Qorti li Markovic kellu l-intenzjoni jammetti l-akkużi. Waqt is-smigħ, l-akkużat ikkonferma li kien jaf x'kienu n-natura u l-konsegwenzi tal-ammissjoni tiegħu, li l-Qorti aċċettat wara li ssodisfat ruħha li kienet saret b'mod liberu u volontarju.
Meta ġiet biex tagħti s-sentenza, il-Qorti, ippreseduta mill-Imħallef Neville Camilleri, ikkunsidrat diversi fatturi, fosthom is-serjetà tar-reati, il-fatt li Markovic kellu rekord kriminali nadif u li ammetta l-ħtija tiegħu fi stadju bikri tal-proċeduri. Il-Qorti rreferiet ukoll għall-ġurisprudenza stabbilita dwar tnaqqis fis-sentenza wara ammissjoni ta' ħtija.
Markovic ġie kkundannat għal piena effettiva ta' tmien snin priġunerija.
Minbarra s-sentenza ta' ħabs, il-Qorti ħarġet ordni ta' protezzjoni favur il-vittma għal ħames snin wara li tiskadi l-piena ta' priġunerija u ordnat lill-akkużat iħallas aktar minn €4,465 fi spejjeż tal-esperti. Kwalunkwe liċenzja tal-armi li seta' kellu Markovic ġiet revokata wkoll.
.png)
