Raġel li allega li kien vittma ta’ ħtif, attakk vjolenti, serqa u abbuż sesswali xehed fil-Qorti li wieħed mill-allegati aggressuri qallu li ma kien hemm ebda skop li jirrapporta lill-pulizija minħabba li Mohamed Ali Ahmed Elmushraty, magħruf bħala Lilu King, kien “protett mill-Gvern”.
Ix-xhud kien qed jagħti x-xhieda tiegħu fil-kumpilazzjoni kontra Jordan Azzopardi, magħruf bħala “El Chapo ta’ Malta”, Mohamed Ali Ahmed Elmushraty, Noureddin Amer Miloud Almahmoudi u Abdulmomen Abudagil, li kollha qed jiċħdu l-akkużi kontrihom.
Qabel bdiet ix-xhieda, il-Qorti ġiet infurmata li d-difiża ressqet ilment kriminali separat fejn talbet investigazzjoni fuq l-istess xhud dwar allegazzjonijiet ta’ theddid, fastidju u attentat ta’ rikatt fil-konfront tal-eks sieħba tiegħu.
L-allegat vittma xehed permezz ta’ video link bl-għajnuna ta’ interpretu. Huwa spjega li kien ilu għal madwar sitt snin f’relazzjoni ma’ qariba ta’ wieħed mill-imputati u li r-relazzjoni kienet tinżamm sigrieta minħabba l-biża’ tal-mara mir-reazzjoni tal-familja tagħha.
Skont ix-xhud, ġimgħat qabel l-allegat attakk, Abdulmomen Abudagil ikkuntattjah biex jiltaqa’ miegħu personalment. Qal li ftit jiem qabel il-laqgħa, l-eks sieħba tiegħu wissietu biex ma jmurx għax “kien se jiġri xi ħaġa ħażina”.
Huwa rrakkonta li mar f’ħanut f’San Ġwann fejn kellu jiltaqa’ ma’ Abudagil, iżda ftit wara nduna li xi ħaġa ma kinitx f’postha hekk kif impjegat allegatament għalaq il-ħanut u telaq.
Ix-xhud allega li mbagħad ġie attakkat, maqbud minn għonqu u mkaxkar lejn kantina. Huwa qal li persuna oħra bdiet tagħtih daqqiet sakemm ntilef minn sensih.
Meta reġa’ ġie f’sensih, qal li sab ruħu għarwien mal-art fil-kantina b’idejh marbutin permezz ta’ cable ties. Huwa identifika lit-tieni persuna bħala Jordan Azzopardi, li qal li għarfu permezz tat-tattoo fuq idejh u għonqu.
Skont ix-xhieda tiegħu, Azzopardi allegatament qallu biex ifittxu fuq l-internet għax kien magħruf bħala “El Chapo”.
L-allegat vittma sostna li matul il-ħin li kien miżmum fil-kantina ġie msawwat diversi drabi u ntilef minn sensih aktar minn darba. Qal ukoll li l-imputati kienu qed jinsistu biex jagħtihom aċċess għall-mobile tiegħu minħabba suspett li kellu ritratti kompromettenti relatati mal-eks sieħba tiegħu.
Huwa qal li waqt li Azzopardi kien barra jpejjep, Abudagil allegatament urieh filmati ta’ persuni jiġu aggreditati u saħansitra jiġu mogħtija daqqiet b’sikkina, filwaqt li wissieh li l-istess seta’ jiġrilu jekk ma jikkoperax.
Kien f’dan il-kuntest, qal ix-xhud, li ġie mwissi li jekk imur għand il-pulizija ma kien se jiġri xejn minħabba li Lilu King kien “protett mill-Gvern”.
L-allegat vittma kompla jixhed li sussegwentement ġie abbużat sesswalment b’oġġetti, filwaqt li l-allegati aggressuri allegatament iffilmjaw dak li kien qed iseħħ.
Huwa qal li wara l-attakk eventwalment ta lill-imputati l-password tal-mobile tiegħu u allega li dawn serqulu madwar €800 mill-kartiera tiegħu wara li ċċekkjaw il-kontijiet bankarji u l-applikazzjoni Revolut.
Ix-xhud irrakkonta kif finalment irnexxielu jaħrab meta ttieħed barra mill-ħanut. Huwa qal li għaraf persuna li kienet klijent tar-ristorant fejn kien jaħdem u rnexxielu jidħol fil-vettura tagħha u jitlaq minn fuq il-post.
Minn hemm mar direttament f’għassa tal-pulizija, iżda ftit wara beda jħossu ħażin u ttieħed b’ambulanza l-Isptar Mater Dei għall-kura.
Meta mistoqsi dwar l-effetti tal-inċident, ix-xhud qal li għadu qed jirċievi għajnuna mingħand Victim Support u ammetta li kien saħansitra ħaseb biex itemm ħajtu.
Huwa allega wkoll li missier wieħed mill-imputati pprova jikkonvinċih jabbanduna l-każ billi offrielu ammonti ta’ flus li allegatament telgħu minn €10,000 għal €30,000.
Matul il-kontro-eżami, id-difiża staqsiet lix-xhud dwar allegazzjonijiet ta’ rikatt u trasferimenti ta’ flus relatati mal-eks sieħba tiegħu, allegazzjonijiet li huwa ċaħad kategorikament.
Il-prosekuzzjoni qed titmexxa mill-Ispetturi Wayne Buhagiar u James Turner, flimkien mal-avukati Jurgen Dalli, Darleen Grima u Danika Vella. L-akkużati huma rappreżentati mill-avukati Franco Debono, Marion Camilleri, Herman Mula, Adreana Zammit, Matthew Xuereb, Jacob Magri u Arthur Azzopardi.
Is-smigħ tal-każ għandu jkompli quddiem il-Maġistrat Lara Lanfranco.
.png)
