Raġel ingħata l-ħelsien mill-arrest filwaqt li ieħor inżamm arrestat wara li t-tnejn tressqu l-Qorti akkużati b’reati relatati mat-traffikar tal-kokaina b’rabta ma’ operazzjoni tal-pulizija fil-Mosta.
Jean Paul Spiteri, ta’ 31 sena minn Għawdex, u Justin Chetcuti, ta’ 33 sena mill-Mosta, ġew akkużati li assoċjaw ruħhom ma’ persuni oħra għall-iskop tat-traffikar tad-droga, li fornew jew offrew li jipprovdu kokaina, kif ukoll li kellhom fil-pussess tagħhom droga f’ċirkostanzi li jindikaw li ma kinitx maħsuba għall-użu personali tagħhom.
Il-Qorti semgħet kif l-investigazzjonijiet tal-pulizija dwar allegat traffikar tad-droga wasslu lill-uffiċjali għal residenza fil-Mosta li allegatament kienet qed tintuża għall-preparazzjoni u l-ippakkjar tad-droga għad-distribuzzjoni.
Skont il-prosekuzzjoni, waqt it-tfittxijiet instabet aktar minn kilogramma kokaina, flimkien ma’ kwantità oħra ta’ madwar 70 gramma tal-istess droga. Il-valur tad-droga maqbuda huwa stmat li jilħaq madwar €160,000.
Il-Qorti semgħet ukoll li Jean Paul Spiteri allegatament ipprova jevita l-arrest meta ħarab fuq il-bejt tar-residenza, iżda aktar tard ġie arrestat mill-pulizija.
B’rabta mal-każ infetħet inkjesta maġisterjali sabiex jiġu investigati aktar iċ-ċirkostanzi kollha tal-allegati reati.
Justin Chetcuti qed jiffaċċja wkoll akkużi addizzjonali, fosthom li allegatament wettaq dawn ir-reati waqt li kien suġġett għal ordni ta’ probation imposta fuqu fl-2024. Huwa ġie akkużat ukoll bħala reċidivist minħabba kundanni preċedenti.
Id-difiża talbet għall-ħelsien mill-arrest għaż-żewġ akkużati u argumentat li fil-każ tagħhom kellha tiġi kkunsidrata wkoll ordni ta’ trattament. Il-Qorti semgħet ukoll li l-aħħar kundanna ta’ Spiteri tmur lura għal madwar għaxar snin ilu u kienet relatata ma’ reat tat-traffiku.
Il-prosekuzzjoni oġġezzjonat għat-talba għall-ħelsien mill-arrest, filwaqt li sostniet li l-investigazzjonijiet għadhom għaddejjin u li diversi xhieda ewlenin għadhom ma xehdux. Ġew espressi wkoll tħassib dwar allegat użu ta’ droga minn wieħed mill-akkużati.
Wara li semgħet l-argumenti taż-żewġ naħat, il-Qorti laqgħet it-talba għall-ħelsien mill-arrest ta’ Jean Paul Spiteri taħt diversi kundizzjonijiet.
Huwa ġie ordnat iħallas depożitu ta’ €10,000 u jipprovdi garanzija personali ta’ €40,000. Barra minn hekk, irid jiffirma l-ktieb tal-pleġġ kuljum u josserva curfew li jobbligah jibqa’ fir-residenza tiegħu bejn id-9.00pm u s-6.00am.
Min-naħa l-oħra, Justin Chetcuti ġie miżmum arrestat sakemm ikomplu l-proċeduri fil-konfront tiegħu.
L-avukati Nicholas Mifsud, Elaine Sammut u Nicole Falzon dehru għad-difiża, filwaqt li l-prosekuzzjoni tmexxiet mill-Ispettur Mark Anthony Mercieca flimkien mal-avukat tal-Uffiċċju tal-Avukat Ġenerali Daniel Tabone.
Il-każ instema’ quddiem il-Maġistrat Ann Marie Thake.
