Xufier ġie ordnat biex iħallas multa ta’ €1,000 u ġie skwalifikat mil-liċenzja tas-sewqan tiegħu għal tliet xhur wara li nstab ħati ta’ sewqan perikoluż li rriżulta f’ħabta b’impatt qawwi f’roundabout fis-Swieqi.
Luke Galea ġie akkużat b’sewqan perikoluż, li kkawża involontarjament ġrieħi ħfief, u li kkawża ħsarat fi proprjetà ta’ terzi persuni wara inċident tat-traffiku li seħħ tard bil-lejl tal-14 ta’ Mejju 2022, għall-ħabta tal-11:15 ta’ filgħaxija, fil-kantuniera ta’ bejn Triq Sant’Andrija u Triq il-Prekursur fis-Swieqi.
Il-kolliżjoni involviet vettura tat-tip Toyota Tercel misjuqa mill-akkużat, u Kia Sportage misjuqa mill-vittma, li ġie identifikat bħala avukat, u li kien akkumpanjat minn passiġġiera mara li hija Maġistrat.
Il-qorti semgħet kif il-vittma kien qed joħroġ minn Triq il-Prekursur biex jidħol bil-mod fir-roundabout meta l-akkużat, li kien qed isuq b’veloċità qawwija mid-direzzjoni ta’ San Ġiljan lejn Baħar iċ-Ċagħaq, baqa’ dieħel head-on fil-bieba tan-naħa tax-xufier tal-karozza tal-vittma. L-impatt kien tant qawwi li dawwar il-vettura tal-vittma għal fuq il-karreġġjata opposta u ħalla l-parti ta’ quddiem tal-vettura tal-akkużat mofqugħa kompletament.
Il-provi ppreżentati fil-qorti wrew marki twal tal-brejkijiet li ħalliet il-vettura tal-akkużat, liema marki qasmu għal fuq l-istruttura interna tar-roundabout. Il-qorti nnutat li din il-prova fiżika uriet li l-akkużat kien qed isuq b’veloċità ferm akbar minn dik mistennija fuq roundabout, u kienet ukoll indikazzjoni ċara li l-akkużat kien qed isuq fuq in-naħa l-ħażina tat-triq.
It-tobba kkonfermaw li filwaqt li l-vittma sofra uġigħ persistenti fl-ispalla, tbenġil, u tnaqqis fil-mobilità għal bosta xhur, il-ġrieħi fl-aħħar mill-aħħar ġew iċċertifikati bħala ġrieħi hfief.
Waqt il-proċeduri, id-difiża qajmet oġġezzjoni legali fejn indikat żball fl-ittra tal-akkuża uffiċjali. Il-prosekuzzjoni kienet ħawdet in-numru tar-reġistrazzjoni għall-vettura tal-akkużat, u d-difiża argumentat li dan l-iżball kellu jwassal għal liberazzjoni immedjata.
Madankollu, il-qorti ċaħdet dan l-argument, u ddeċiediet li żball ta’ din in-natura ma jippreġudikax d-difiża tal-akkużat, peress li l-identità tax-xufier u l-fatti tal-inċident kienu kompletament ċari.
Is-sentenza osservat ukoll li l-vittma ammetta parti mill-ħtija peress li ħareġ fuq ir-roundabout meta din ma kinitx għal kollox ħielsa. Minkejja dan, il-maġistrat iddetermina li l-gravità tal-inċident kienet ir-riżultat dirett tal-veloċità eċċessiva u n-nuqqas tal-akkużat li jnaqqas il-veloċità kif kien qed jersaq lejn ir-roundabout.
L-akkużat instab ħati tal-akkużi kollha miġjuba kontrih, inkluż sewqan perikoluż, li kkawża involontarjament ġrieħi ħfief, u li kkawża ħsara fi proprjetà ta’ terzi persuni.
Il-qorti kkundannat lil Luke Galea biex iħallas multa ta’ €1,000. Barra minn hekk, il-maġistrat ordna li l-liċenzja tas-sewqan tiegħu tiġi skwalifikata għal tliet xhur u ordna li jiġu mnaqqsa ħames punti penali mill-fedina tas-sewqan tiegħu.
Il-każ kien ippresedut minn Maġistrat Antoine Agius Bonnici.
.png)
