Il-Kummissjoni tas-Safeguarding tal-Knisja pprojbiet tliet ħaddiema tal-Knisja minn kull attività pastorali wara li nstabu li wettqu abbuż sesswali fuq minorenni, skont ir-rapport annwali tagħha għall-2025.
Il-kummissjoni, li tieħu ħsieb ilmenti relatati ma’ persuni involuti fil-Knisja fi ħdan l-Arċidjoċesi ta’ Malta u l-provinċji reliġjużi preżenti f’Malta, qalet li matul l-2025 irċeviet 47 referral li kienu jinvolvu 44 persuna.
Minn dawn, 23 każ kienu relatati ma’ minorenni filwaqt li 24 kienu jinvolvu adulti vulnerabbli.
Ir-rapport jgħid ukoll li ħames referrals kienu relatati ma’ allegati każijiet li seħħew aktar minn għaxar snin ilu u li għadhom mhux konklużi.
Mill-ilmenti kollha investigati, sitta ġew sostanzjati, b’ħamsa minnhom relatati ma’ minorenni.
Wieħed minn dawn il-każijiet kien jinvolvi soru jew saċerdot reliġjuż, filwaqt li tnejn oħra kienu jinvolvu lajċi. It-tliet persuni nstabu li wettqu abbuż sesswali u għalhekk ġew ipprojbiti minn kull forma ta’ xogħol pastorali jew attività tal-Knisja.
Żewġ każijiet oħra relatati ma’ minorenni kienu jinvolvu abbuż fiżiku u ksur ta’ limiti professjonali rispettivament, bil-persuni involuti jitqiegħdu taħt restrizzjonijiet parzjali.
Il-persuna li nstabet li kisret il-limiti professjonali m’għadhiex involuta fil-Knisja.
Is-sitt każ sostanzjat kien jinvolvi adult vulnerabbli u kien relatat ma’ lajku li nstab li kiser limiti professjonali u sesswali, u li wkoll spiċċa taħt restrizzjonijiet.
Il-kummissjoni qalet li f’każijiet fejn il-vittmi kienu adulti meta sar ir-rapport, l-uffiċjal responsabbli mill-kura u l-appoġġ tal-vittmi offra li jakkumpanjahom għand il-pulizija, iżda dawn għażlu li ma jipproċedux.
Meta l-vittmi kienu għadhom minorenni fil-ħin tal-abbuż allegat, il-każijiet ġew riferuti direttament lill-awtoritajiet ċivili.
Matul is-sena li għaddiet, il-kummissjoni għalqet 43 każ li kienu jinvolvu 40 persuna u żewġ entitajiet.
Minn dawn, 28 każ kienu relatati ma’ minorenni u 15 ma’ adulti vulnerabbli. Tmien każijiet kienu storici u kollha kienu jinvolvu minorenni.
Ir-rapport jgħid ukoll li sitt każijiet oħra ġew meqjusa mhux sostanzjati, għaxar każijiet ma kinux jeħtieġu aktar azzjoni, għaxra oħra ma tqisux bħala kwistjonijiet ta’ safeguarding u għaxar każijiet ġew investigati internament mill-organizzazzjonijiet rispettivi.
Lil hinn mill-investigazzjoni tal-ilmenti, il-kummissjoni qalet li matul l-2025 organizzat 36 sessjoni ta’ taħriġ dwar safeguarding għal 1,111 persuna involuta fil-Knisja, b’kollaborazzjoni mal-Pastoral Formation Institute.
Hija ressqet ukoll 122 applikazzjoni quddiem il-Qrati ta’ Malta biex tivverifika jekk persuni involuti fil-Knisja kinux irreġistrati fir-Reġistru tal-Offenders taħt l-Att dwar il-Ħarsien tal-Minorenni, li koprew total ta’ 4,508 persuna.
Barra minn hekk, ġew eżaminati 32 applikazzjoni ta’ membri tal-kleru barranin li kienu se jwettqu xogħol pastorali temporanju fl-Arċidjoċesi.
Il-kummissjoni qalet li bħalissa qed taħdem fuq inizjattivi ġodda fosthom proġett pilota bl-isem Listening Spaces, li għandu l-għan li jiġbor esperjenzi ta’ vittmi u jsaħħaħ il-vuċi tagħhom.
Qed tiġi żviluppata wkoll għodda ġdida biex entitajiet tal-Knisja jkunu jistgħu jivverifikaw kemm qed jimxu mal-politiki eżistenti ta’ safeguarding.
Il-kummissjoni ġiet magħżula wkoll mill-Kummissjoni Pontifiċja għall-Ħarsien tal-Minorenni biex tirrappreżenta lill-Ewropa f’inizjattiva dwar l-għarfien tal-abbuż online.
Kull min għandu tħassib relatat ma’ safeguarding jista’ jagħmel kuntatt mal-kummissjoni permezz tal-email [email protected] jew billi jċempel 22470950.
-2.png)
