Żewġt irġiel arrestati f'Ħal Għaxaq b’rabta ma’ traffikar ta’ droga
Żewġt irġiel ġew arrestati wara li l-pulizija allegatament sabet fil-pussess tagħhom diversi qratas suspettati kannabis, kokaina u eroina waqt osservazzjoni f’Ħal Għaxaq
minn Jaelle Borg
.png)
Żewġt irġiel ġew arrestati b’rabta ma’ allegat traffikar ta’ droga wara li l-pulizija sabet fil-pussess tagħhom diversi sustanzi suspettati droga waqt operazzjoni f’Ħal Għaxaq.
Fi stqarrija, il-pulizija qalet li waqt osservazzjoni li kienet qed issir għall-ħabta tal-4:15pm, l-uffiċjali nnutaw li ż-żewġ irġiel kienu qed iġibu ruħhom b’mod suspettuż f’park fi Triq id-Dejl, Ħal Għaxaq.
.png)
Dan wassal biex il-pulizija tagħmel tfittxija fuq iż-żewġ persuni u fuq vettura li kienet fil-viċin.
Matul it-tfittxija, il-pulizija allegatament sabet 70 qratas suspettati kannabis, 24 sachet suspettati kokaina u 16-il sachet suspettati eroina.
L-irġiel arrestati huma resident ta’ Ħamrun ta’ 34 sena u resident ta’ Ħal Qormi ta’ 20 sena.
Huma mistennija jitressqu l-Qorti nhar l-Erbgħa f’nofsinhar quddiem il-Maġistrat Astrid May Grima LL.D.
-2.png)
