Marsaxlokk FC ressqu protest formali quddiem il-Bord tal-Protesti tal-Malta Football Association (MFA) fejn talbu li r-riżultat tal-Finalissima tal-YoHealth Malta Premier tas-Sibt li għadda jiġi annullat u l-partita terġa’ tintlagħab.
Il-klabb qed isostni li l-gowl deċiżiv ta’ Floriana fid-92 minuta qatt ma kellu jingħata għax, skonthom, il-ballun daħal direttament minn throw-in mingħajr ma mess ma’ xi plejer — sitwazzjoni li hija projbita mir-regoli tal-logħba.
Il-gowl ta lil Floriana rebħa ta’ 2-1 u magħha t-titlu nazzjonali.
Fil-ħin miżjud, meta l-iskor kien għadu 1-1, id-difensur ta’ Floriana Carlo Zammit Lonardelli xeħet throw-in mix-xellug tal-grawnd.
Il-ballun qabeż lill-plejers kollha, niżel fil-kaxxa u spiċċa fix-xibka ta’ Marsaxlokk.
Ir-referee Matthew De Gabriele ta l-gowl wara li ddeċieda li l-attakkant ta’ Floriana Kenan Dervisagic kien mess il-ballun qabel qasam il-linja, u attribwixxa l-gowl lilu.
Madankollu, Marsaxlokk qed jinsisti li ma kien hemm l-ebda kuntatt mal-ballun minn xi plejer.
Fil-protest tiegħu, il-klabb qal li analiżi ta’ filmati HD turi li t-trajettorja, l-ispin u l-veloċità tal-ballun baqgħu kompletament l-istess mill-mument li telaq minn idejn Zammit Lonardelli sal-mument li daħal fix-xibka.
“Il-ballun żamm spin uniformi kompletament. Ma bidilx it-trajettorja, il-veloċità jew id-direzzjoni tar-rotazzjoni tiegħu,” sostna l-klabb fil-protest.
Marsaxlokk argumenta li anke l-iċken kuntatt minn plejer kien inevitabbilment jibdel il-moviment tal-ballun.
“Anke kuntatt minimu kien jikkawża frizzjoni u reazzjoni aerodinamika immedjata, iżda dan ma seħħx,” sostna l-klabb.
Il-klabb qed jibbaża l-argument tiegħu fuq il-Liġi 15 tal-IFAB, li tgħid b’mod ċar li gowl ma jistax jiġi skorjat direttament minn throw-in.
Skont Marsaxlokk, kieku r-referee ddeċieda li l-ballun ma mess ma’ ħadd, il-logħob kellu jerġa’ jibda b’goal kick u mhux b’gowl validu.
Il-klabb qed jargumenta li dan ma kienx każ ta’ interpretazzjoni suġġettiva tar-referee iżda “żball tekniku ċar” fl-applikazzjoni tar-regoli.
Skont ir-regolamenti tal-MFA, deċiżjonijiet ta’ ġudizzju mir-referees ġeneralment ma jistgħux jiġu kkontestati, iżda żbalji tekniċi fl-applikazzjoni tar-regoli jistgħu jkunu bażi għal sfida legali.
Marsaxlokk qal ukoll li d-deċiżjoni ma kellhiex impatt biss fuq ir-riżultat tal-partita iżda wkoll fuq il-konsegwenzi sportivi u finanzjarji relatati mal-kwalifikazzjoni għall-kompetizzjonijiet tal-UEFA.
Il-klabb sostna li jekk ma tittieħed l-ebda azzjoni, dan il-każ jista’ jibqa’ “tebgħa fl-istorja tal-futbol Malti”.
Fil-protest tiegħu, Marsaxlokk talab lill-Bord tal-Protesti biex jiddikjara l-protest validu, jirrikonoxxi li seħħ żball tekniku serju fl-applikazzjoni tal-Liġi 15, jannulla r-riżultat tal-partita tas-16 ta’ Mejju u jordna replay sħiħ tal-Finalissima.
Il-protest ġie ffirmat mill-avukati Carlos Bugeja u Maurice Meli.
-2.png)
