Zahra ta’ 43 sena ttella’ b’arrest quddiem il-qorti fis-27 ta’ Marzu, waqt li l-ispetturi tal-pulizija xehdu dwar l-allegazzjonijiet mogħtija mill-mara.
L-Ispettur Antonello Magri qal lill-qorti li fit-18 ta’ Marzu madwar is-1.45pm, il-mara rrappurtat l-għassa ta’ Birżebbuġa li kienet ġiet stuprata madwar seba’ xhur qabel.
Skont id-dikjarazzjoni tagħha, il-mara l-ewwel kienet saret taf lill-akkużat fejn tieqaf tal-linja f’Ħal Far, fejn allegatament staqsiha biex tkun il-maħbuba tiegħu. Wara li rrifjutat, hu allegatament ħadha ġewwa l-garaxx tiegħu u stupraha.
Il-mara qalet lill-pulizija li fix-xhur li segwew l-allegat attakk, Zahra kompla jsegwiha u jhedda, peress li kienu jgħixu qrib xulxin. Qalet li spiss kien joqrob lejha qrib fejn iltaqgħu l-ewwel darba ħdejn ir-residenza tiegħu, fejn kien iwaqqaf il-karozza tiegħu u jħeġġiġha tidħol ġewwa, filwaqt li kienet tirċievi telefonati minn numri anonimi.
Hi spjegat li damet biex tirrapurta l-inċident minħabba biża’ u diffikultà biex titkellem, minħabba li hi mill-Etjopja. Il-mara żiedet li kienet marret tfittex għajnuna miċ-ċentru fejn kienet tirrsjedi, iżda qalulha li billi l-inċident ma seħħx fiċ-ċentru, ma setgħux jgħinuha.
Il-qorti semgħet ukoll li l-vittma kienet tidħol fil-karozza minħabba biża’. Ammettiet ukoll li f’ħin wieħed ħadet madwar €1,000 mingħandu.
Wara ħareġ mandat ta’ arrest u Zahra ġie arrestat meta mar jiffirma l-għassa tal-pulizija.
L-Ispettur Marshall Mallia tela’ jixhed ukoll, u kkonferma r-rapport, fejn qal li l-vittma allegatament identifikat lil Zahra u offriet dettalji dwar il-vettura tiegħu. Qal li rrakkontat kif, lejn tmiem is-sajf, l-akkużat ħeġġeġha tidħol fil-karozza tiegħu qabel ma ħadha ġewwa l-garaxx tiegħu f’Ħal Far, fejn allegatament sforza ruħu fuqha.
Il-qorti semgħet kif l-akkużat hedded lill-vittma.
“Hawnhekk tista’ tgħajjat u twerżaq kemm trid pero mhu se jisimgħak ħadd…il-klieb ħa jagħmlu għalik jekk tipprova taħrab”, qalilha Zahra allegatament,
F’dikjarazzjoni lill-pulizija, Zahra ċaħad l-allegazzjonijiet. Sostna li kien jaf il-vittma u qal li kien iwassalha diversi postijiet, iżda ċaħad li kellu x’jaqsam magħha. Hu stqarr ukoll li hi kienet serqet envelop li fih madwar €1,000 mingħandu, li wassal għal kunflitt.
Il-prosekuzzjoni qed titmexxa mill-Ispetturi Wayne Buhagiar, Marshall Mallia u Antonello Magri, flimkien mal-avukat Jurgen Dalli mill-Uffiċju tal-Avukat Ġenerali . L-Avukat difensur Franco Debono qed jirrappreżenta lill-akkużat.
Il-Maġistrat Ann-Marie Thake presediet is-seduta.
Il-każ għandu jkompli nhar il-21 ta’ April f’nofsinhar.
